தலையில் ஹாலோ பிளாக் கல்லை போட்டு இளைஞா் கொலை

திருப்பூா் பழைய பேருந்து நிலையம் அருகே உள்ள குள்ளி செட்டியாா் வீதியில் ஹாலோ பிளாக் கல்லால் தாக்கி இளைஞா் கொலை செய்யப்பட்டாா்.

திருப்பூா் குள்ளி செட்டியாா் வீதியில் செயல்பட்டு வரும் தனியாா் மதுபானக் கூடத்தில் இருந்த நபா்களுக்கு இடையே ஞாயிற்றுக்கிழமை வாக்குவாதம் ஏற்பட்டுள்ளது. மது போதையில் தகராறு முற்றிய நிலையில், ஆத்திரமடைந்த மா்ம நபா்கள் அங்கு கிடந்த ஹாலோ பிளாக் கல்லை எடுத்து இளைஞரின் தலையில் சரமாரியாக தாக்கியுள்ளனா். இதில் பலத்த காயமடைந்த இளைஞா் சம்பவ இடத்திலேயே உயிரிழந்தாா். தாக்குதல் நடத்திய நபா்கள் உடனடியாக அங்கிருந்து தப்பிவிட்டனா்.

பொதுமக்கள் நடமாட்டம் மிகுந்த பகுதியில் நடந்த இச்சம்பவம் குறித்துத் தகவல் அறிந்ததும், திருப்பூா் தெற்கு காவல் நிலைய போலீஸாா் சம்பவ இடத்துக்கு விரைந்தனா். உயிரிழந்த இளைஞரின் சடலத்தை கைப்பற்றி உடற்கூறாய்வுக்காக திருப்பூா் அரசு மருத்துவக் கல்லூரி மருத்துவமனைக்கு அனுப்பிவைத்தனா்.

கொலை செய்யப்பட்ட நபா் யாா், எந்த ஊரைச் சோ்ந்தவா் என்பது குறித்தும், மதுபோதையில் ஏற்பட்ட மோதலா அல்லது முன் விரோதம் காரணமா என்பது குறித்தும் போலீஸாா் வழக்குப் பதிவு செய்து விசாரணை நடத்தி வருகின்றனா். மேலும், அப்பகுதியில் உள்ள கண்காணிப்பு கேமரா காட்சிகளை ஆய்வு செய்து கொலையாளிகளை தேடி வருகின்றனா்.