வெள்ள நிவாரண உதவிகள் அனுப்பி வைப்பு

கேரள மாநிலத்தில் பெருவெள்ளத்தால் பாதிக்கப்பட்ட மக்களுக்காக தருமபுரி மக்கள் மன்றம் சார்பில் ஞாயிற்றுக்கிழமை ரூ. 5 லட்சம் மதிப்பிலான நிவாரண உதவிகள் லாரியில் அனுப்பி வைக்கப்பட்டுள்ளன.
5 கிலோ அரிசி, ஒரு கிலோ பருப்பு, சமையல் எண்ணெய், பொடி வகைகள், வெங்காயம், இஞ்சி மற்றும் மசாலாப் பொருட்கள் அடங்கிய ஒரு தொகுப்பு ரூ. 815 மதிப்பில் ஏற்பாடு செய்யப்பட்டது. இதன்படி, 500 குடும்பங்களுக்குத் தேவையான தொகுப்புகள் மற்றும் இதர நிவாரணப் பொருட்களும் ஞாயிற்றுக்கிழமை சேகரிக்கப்பட்டன.
தருமபுரி மக்கள் மன்றத்தைச் சேர்ந்த உறுப்பினர்கள், புரவலர்கள் இதற்கான தொகைகளை பங்களித்தனர். கேரள மாநிலம் பாலக்காட்டில் தற்போது பணியாற்றி வரும் தன்னார்வலர்கள் மூலம் இவை நேரடியாக பாதிக்கப்பட்ட குடும்பங்களுக்கு வழங்கப்படவுள்ளது.
தொடர்ந்து இன்னும் சில நாள்களுக்கு கேரள மாநிலத்துக்கு நிவாரண உதவிகள் அனுப்பி வைக்கும் பணி தொடரும் என மக்கள் மன்றத்தினர் தெரிவித்தனர்.