மின்வாரிய ஊழியா்கள் காத்திருப்புப் போராட்டம்

மின்வாரியத்தை தனியாா் மயமாக்கும் முயற்சியை கண்டித்து, தருமபுரி மின்வாரிய மேற்பாா்வை பொறியாளா் அலுவலக வளாகத்தில் ஊழியா்கள் காத்திருப்புப் போராட்டத்தில் திங்கள்கிழமை ஈடுபட்டனா்.

இந்த காத்திருப்புப் போராட்டத்துக்கு, சிஐடியு மின் ஊழியா் மத்திய அமைப்பு மாநிலத் துணைத் தலைவா் பி.ஜீவா தலைமை வகித்தாா். மாவட்டத் தலைவா் தீ.லெனின் மகேந்திரன், பொறியாளா் அமைப்பு மாவட்டத் தலைவா் ஆா்.சுந்தரமூா்த்தி, ஏஐசிசிடியு மாநிலத் தலைவா் முருகன், சம்மேளன மாவட்டத் தலைவா் தேவராஜ், பாட்டாளி தொழிற் சங்க மாநிலச் செயலா் சின்னசாமி ஆகியோா் பேசினா்.

இதில், மின் வாரியத்தை தனியாா் மயமாக்கும் நடவடிக்கையை உடனே நிறுத்த வேண்டும். வாரிய உத்தரவு உள்ளிட்ட தனியாா்மயமாக்கும் அனைத்து உத்தரவுகளையும் ரத்து செய்ய வேண்டும் என்பன உள்ளிட்ட கோரிக்கைகள் வலியுறுத்தப்பட்டன.