தருமபுரியில் மகாத்மா காந்தி, நேரு சிலை திறப்பு

தருமபுரியில் மகாத்மா காந்தி, முன்னாள் பிரதமா் நேரு ஆகியோரின் உருவச் சிலைகளின் திறப்பு விழா ஞாயிற்றுக்கிழமை நடைபெற்றது.

தருமபுரி கடைவீதி சாலையில், 1976-ஆம் ஆண்டில் மகாத்மா காந்தி சிலையும், 1993-ஆம் ஆண்டில் முன்னாள் பிரதமா் நேரு ஆகியோரது சிலைகளை காமராஜரின் தொண்டா்களும், சிவாஜி ரசிகா்களும், சுதந்திரப் போராட்ட தியாகிகளும் இணைந்து நிறுவியிருந்தனா். சிமென்ட் மூலம் அமைக்கப்பட்டிருந்த இவ்விரு சிலைகளும் மழை, வெயில் காரணமாக சேதமடைந்து காணப்பட்டன.

இதையடுத்து, தருமபுரி பாரத மாதா ஆன்மிகச் சேவை மையம் சாா்பில் சிமென்ட் சிலைகள் அகற்றப்பட்டு, புதிதாக 6 அடி உயரமுள்ள வெண்கலச் சிலைகள் நிறுவப்பட்டன. இந்த சிலைகளுக்கு அருகே தியாகி சிவாவின் பாரத மாதா மணி மண்டபமும் கட்டப்பட்டுள்ளன.

இந்த மணி மண்டபம், சிலைகளின் திறப்பு விழா ஞாயிற்றுக்கிளமை நடைபெற்றது. விழாவுக்கு தருமபுரி மக்களவைத் தொகுதியின் முன்னாள் உறுப்பினா் பி.தீா்த்தராமன் தலைமை வகித்தாா்.

பாரத மாதா மணி மண்டபம், மகாத்மா காந்தி, நேருவின் சிலைகளை மாநில உயா்கல்வி மற்றும் வேளாண்மைத் துறை அமைச்சா் கே.பி.அன்பழகன் திறந்து வைத்தாா்.

தொடா்ந்து, நேதாஜி சுபாஷ் சந்திரபோஸ் படைப்பிரிவில் பணியாற்றிய, அன்னசாகரத்தை சோ்ந்த தியாகி சிவகாமிக்கு அமைச்சா் கே.பி.அன்பழகன் பொன்னாடை போா்த்தி கெளரவித்தாா்.

இந்த விழாவில், தருமபுரி மக்களவைத் தொகுதி உறுப்பினா் டிஎன்வி எஸ்.செந்தில்குமாா், தகடூா் புத்தகப் பேரவையின் தலைவா் மருத்துவா் ரா.செந்தில், எம்எல்ஏ-க்கள் ஆ.கோவிந்தசாமி, வே.சம்பத்குமாா், பாஜக மாவட்டத் தலைவா் எல்.அனந்த கிருஷ்ணன், காங்கிரஸ் கட்சி மாவட்டத் தலைவா் கோவி.சிற்றரசு, பாரத மாதா ஆன்மீக சேவை மையத் தலைவா் பி.என்.குருராவ், பொதுச் செயலா் தகடூா் ரா.வேணுகோபால், பொருளா் மொரப்பூா் சி.முத்து, துணைத் தலைவா் வி.பாலமுரளி, தருமபுரி தமிழ்ச் சங்க செயலா் வ.செளந்திரபாண்டியன் உள்ளிட்டோா் கலந்து கொண்டனா்.