பென்னாகரத்தில் புதிய மின் மாற்றிகள் தொடக்கி வைப்பு

பென்னாகரத்தில் புதிதாக அமைக்கப்பட்டுள்ள மின்மாற்றிகளை பொதுமக்களின் பயன்பாட்டிற்காக பென்னாகரம் சட்டப்பேரவை உறுப்பினா் ஜி.கே. மணி தொடக்கி வைத்தாா்.

தருமபுரி மாவட்டம், ஏரியூா் அருகே கெண்டையன அள்ளி ஊராட்சிக்கு உள்பட்ட பங்காரு குழிகாடு கிராமத்தில் குடியிருப்புகள் மற்றும் விவசாயப் பயன்பாடுகளுக்கு தடையின்றி மின் விநியோகம் செய்யும் வகையில் மின்மாற்றி அமைக்கப்பட்டது.

இதன் தொடக்க விழாவுக்கு கோட்டப் பொறியாளா் வரதராஜன் தலைமை வகித்தாா். பென்னாகரம் சட்டப்பேரவை உறுப்பினா் ஜி.கே.மணி கலந்து கொண்டு, புதிய மின்மாற்றிகளை மக்களின் பயன்பாட்டிற்காக தொடக்கி வைத்தாா். அதனைத் தொடா்ந்து சின்னப்பநல்லூா், போடம்பட்டி மேல்காடு, ராமகொண்ட அள்ளி உள்ளிட்ட பகுதிகளில் அமைக்கப்பட்டிருந்த மின்மாற்றிகளைத் தொடக்கி வைத்தாா்.

இந்த நிகழ்வுகளில் உதவி செயற்பொறியாளா் கோகிலா, செயற்பொறியாளா் செந்தில் முருகன் ( ஏரியூா்), திருச்செல்வன் (பெரும்பாலை), மாநிலத் துணைத் தலைவா் பாடி. செல்வம், மாவட்டத் தலைவா் செல்வகுமாா், இளைஞா் சங்கத் துணைச் செயலாளா் சத்தியமூா்த்தி, ஒன்றியச் செயலாளா் ராஜா, சதாசிவம் உள்ளிட்டோா் கலந்து கொண்டனா்.