பழுதடைந்த சாலைகளை மேம்படுத்தக் கோரி தருமபுரி எம்எல்ஏ தரையில் அமா்ந்து தா்னா

தருமபுரியை அடுத்த கம்மம்பட்டி, அதியமான்கோட்டை கோடியூா் ஆகிய பழுதடைந்த சாலைகளை மேம்படுத்தக் கோரி, தருமபுரி சட்டப் பேரவை உறுப்பினா் எஸ்.பி.வெங்கடேஸ்வரன் மாவட்ட ஆட்சியா் அலுவலகம் அருகே தரையில் அமா்ந்து வெள்ளிக்கிழமை தா்னா போராட்டத்தில் ஈடுபட்டாா். தருமபுரி சட்டப் பேரவைத் தொகுதியில் பழுடைந்துள்ள ஊரகச் சாலைகளை மேம்படுத்த வேண்டும் என வலியுறுத்தி, உண்ணாவிரதப் போராட்டத்தில் ஈடுபடுவதாக தருமபுரி பாமக சட்டப் பேரவை உறுப்பினா் எஸ்.பி.வெங்டேஸ்வரன் அறிவித்திருந்தாா். இந்தப் போராட்டத்துக்கு அனுமதி இல்லை என மறுத்த காவல்துறை, அவரிடம் அதற்கான அறிவிப்பை அளித்துள்ளது. இந்நிலையில், உண்ணாவிரதப் போராட்டத்துக்கு காவல்துறையினா் அனுமதி மறுத்ததால், ஆட்சியா் அலுவலகம் அருகே தரையில் அமா்ந்து சட்டப் பேரவை உறுப்பினா் எஸ்.பி.வெங்டேஸ்வரன் வெள்ளிக்கிழமை தா்னாவில் ஈடுபட்டாா். அவருடன் பாமக மாநில நிா்வாகிகள், பெ.சாந்தமூா்த்தி, சண்முகம், பெரியசாமி, நல்லம்பள்ளி ஊராட்சி ஒன்றியக் குழுத் தலைவா் மகேஸ்வரி உள்ளிட்டோரும் போராட்டத்தில் ஈடுபட்டனா். இதுகுறித்து தகவல் அறிந்த வருவாய்த்துறை மற்றும் ஊரக வளா்ச்சி, நெடுஞ்சாலைத்துறை அதிகாரிகள் அங்கு வந்து, சட்டப் பேரவை உறுப்பினரிடம் பேச்சுவா்த்தையில் ஈடுபட்டனா். இதில், அவா் கோரிக்கை விடுத்த கம்மம்பட்டி அருகே மலையூா்காடு, அதியமான்கோட்டை அருகே கோடியூா் ஆகிய பழுதடைந்த சாலைகளை சீரமைத்துத் தர நடவடிக்கை எடுப்பதாக உறுதியளித்தனா். இதையடுத்து, இரண்டு மணி நேரம் கழித்து தனது போராட்டத்தை சட்டப் பேரவை உறுப்பினா் எஸ்.பி.வெங்கடேஸ்வரன் நிறைவு செய்தாா். பட விளக்கம்: தருமபுரி ஆட்சியா் அலுவலகம் அருகே தரையில் அமா்ந்து போராட்டத்தில் ஈடுபட்ட சட்டப் பேரவை உறுப்பினா் எஸ்.பி.வெங்கடேஸ்வரன்.