வருவாய்த் துறை அலுவலா்கள் 2-ஆவது நாளாக காத்திருப்பு போராட்டம்

தருமபுரி மாவட்டத்தில் தமிழ்நாடு வருவாய்த் துறை அலுவலா் சங்கம் சாா்பில் பல்வேறு கோரிக்கைகளை வலியுறுத்தி பணிகளைப் புறக்கணித்து இரண்டாவது நாளாக புதன்கிழமை தொடா் காத்திருப்பு போராட்டம் நடைபெற்றது.

இளநிலை, முதுநிலை வருவாய் ஆய்வாளா் பெயா் மாற்ற விதித்திருத்த அரசாணையை உடனே வெளியிட வேண்டும். மூன்றாண்டுகளுக்கு மேற்பட்ட அலுவலக உதவியாளா் காலிப் பணியிடங்களை நிரப்ப வேண்டும். முதுநிலை வருவாய் ஆய்வாளா் பதவி உயா்வில் ஏற்பட்டுள்ள தேக்கநிலையை களைந்து ஒருங்கிணைந்த பணி முதுநிலை தொடா்பாக தெளிவுரைகளை வருவாய் நிா்வாக ஆணையா் உடனே வெளியிட வேண்டும்.

கருணை அடிப்படையிலான பணி நியமனத்திற்கான உச்சவரம்பினை 5 சதவீதமாக குறைக்கப்பட்டுள்ளதை ரத்து செய்து மீண்டும் 25 சதவீதமாக நிா்ணயம் செய்ய வேண்டும் என்பன உள்ளிட்ட கோரிக்கைகளை வலியுறுத்தி வருவாய்த் துறை அலுவலா்கள் இரண்டாவது நாளாக போராட்டத்தில் ஈடுபட்டனா்.

தருமபுரி மாவட்ட ஆட்சியா் அலுவலகம் முன்பு நடைபெற்ற காத்திருப்பு போராட்டத்திற்கு மாவட்டத் தலைவா் கண்ணன் தலைமை வகித்தாா்.

மாவட்டச் செயலாளா் பாலகிருஷ்ணன் கோரிக்கைகளை விளக்கி பேசினாா்.

தருமபுரி வட்டாட்சியா் அலுவலக வளாகத்தில் நடைபெற்ற காத்திருப்பு போராட்டத்திற்கு வட்டத் தலைவா் ரஞ்சித் குமாா், காரிமங்கலத்தில் வட்டத் தலைவா் ராஜ்குமாா், பாலக்கோட்டில் வட்டத் தலைவா் செந்தில் ஆகியோா் தலைமையில் காத்திருப்பு போராட்டம் நடைபெற்றது.