ஒகேனக்கல்லுக்கு நீா்வரத்து 5,000 கனஅடி

தமிழக காவிரி கரையோர நீா்ப்பிடிப்புப் பகுதிகளில் பெய்த மழையால் ஒகேனக்கல்லுக்கு நீா்வரத்து விநாடிக்கு 5,000 கனஅடியாக நீடிக்கிறது.

அஞ்செட்டி, நாற்றாம்பாளையம், கேரட்டி, கெம்பாகரை, ராசி மணல், மொசல்மடுவு, பிலிகுண்டுலு மற்றும் அதைச் சுற்றியுள்ள வனப் பகுதியில் கடந்த இரண்டு நாள்களாக கன மழை பெய்து வருகிறது. இதன்காரணமாக காவிரி ஆற்றின் கிளை ஆறான தொட்டெல்லா ஆற்றில் நீா்வரத்து அதிகரித்துள்ளது.

இந்த நிலையில், ஒகேனக்கல்லுக்கு செவ்வாய்க்கிழமை நிலவரப்படி விநாடிக்கு 5,000 கனஅடியாக இருந்த நீா்வரத்து புதன்கிழமை காலை 6,500 கனஅடியாகவும், மாலை 5 மணி நிலவரப்படி 8,000 கனஅடியாகவும் அதிகரித்து பிறகு இரவு 7 மணி நிலவரப்படி 5,000 கனஅடியாக குறைந்தது.

நீா்ப்பிடிப்பு பகுதியை ஒட்டியுள்ள வனப்பகுதியில் பெய்த மழை காரணமாக ஒகேனக்கல்லுக்கு நீா்வரத்து அதிகரிப்பதும் குறைவதுமாக உள்ளது. மேலும் நீா்ப்பிடிப்புப் பகுதிகளில் பெய்த மழையால் ஒகேனக்கல் ஆற்றில் வெள்ளம் செந்நிறமாக மாறியுள்ளது.

இந்த நிலையில், ஒகேனக்கல் காவிரியில் பரிசல் இயக்க மாவட்ட ஆட்சியா் வே. சரவணன் தற்காலிக தடை விதித்துள்ளாா். ஒகேனக்கல்லுக்கு வரும் நீா்வரத்தை பிலிகுண்டுலுவில் மத்திய நீா்வளத் துறை அதிகாரிகள் கணக்கிட்டு வருகின்றனா்.