இன்று மகளிர் விளையாட்டுத் தேர்வு போட்டி

கிருஷ்ணகிரியில் இன்று,  தேசிய மகளிர் விளையாட்டு போட்டிகளுக்கான மாவட்ட வீராங்கனைகள் தேர்வுப் போட்டி நடைபெறுகிறது.
இதுகுறித்து, மாவட்ட விளையாட்டு மற்றும் இளைஞர் நலன் அலுவலர் எஸ்.சிவரஞ்சன், திங்கள்கிழமை வெளியிட்ட செய்திக் குறிப்பு: 2017 - 18-ஆம் ஆண்டுக்கான தேசிய மகளிர் விளையாட்டுப் போட்டிக்கான மாவட்ட அளவிலான தேர்வுப் போட்டிகள் கிருஷ்ணகிரி மாவட்ட விளையாட்டு அரங்கில் ஏப்.5-ஆம் தேதி நடைபெறுகிறது. இந்தப் போட்டியில் பங்கேற்பவர்கள், 2017-ஆம் ஆண்டு, டிசம்பர் 31-ஆம் தேதியன்று 25 வயதுக்குள்பட்டவர்களாக இருக்க வேண்டும். 
இதில் பிரிவு 1-இல் கூடைப்பந்து, பளுதூக்குதல், நீச்சல் ஆகிய போட்டிகளும், பிரிவு 2-இல் மல்யுத்தம், வளைகோல்பந்து, குத்துச்சண்டை,  பிரிவு 3-இல் தடகளம், இறகுப் பந்து, மேசைப் பந்து,  பிரிவு 4-இல் கோ-கோ, கபடி, கைப்பந்து ஆகிய விளையாட்டுகளில் தேர்வுப் போட்டிகள் நடைபெறும். 
மாவட்ட அளவிலான போட்டியில் தேர்வு செய்யப்படுபவர்கள், மாநில அளவிலான தேர்வுப் போட்டிக்கு தகுதி பெறுவர். எனவே, விருப்பமும், தகுதியும் உள்ளவர்கள் இந்தப் போட்டியில் பங்கேற்கலாம் என  அவர் தெரிவித்தார்.