”அரசுத் திட்டங்கள் அனைத்தும் சிறுபான்மையின மக்களை சென்றடைய வேண்டும்”

கிருஷ்ணகிரி மாவட்டத்தில் அரசுத் திட்டங்கள் அனைத்தும் சிறுபான்மையின மக்களையும் சென்றடைய வேண்டும் என மாவட்ட ஆட்சியா் வி.ஜெயசந்திர பானு ரெட்டி அறிவுறுத்தியுள்ளாா்.

சிறுபான்மையின மக்களின் கல்வி வாய்ப்பினை அதிகரிக்கவும், பொருளாதார மற்றும் வேலைவாய்ப்புகளில் சமப் பங்கினை உறுதி செய்யவும், சிறுபான்மையினா் வாழ்வு நிலையை மேம்படுத்தவும், இனக்கலவரம் மற்றும் வன்முறைகளை தடுத்தல் குறிக்கோளுக்காக பாரத பிரதமரால் புதிய 15 அம்ச திட்டம் செயல்படுத்தப்பட்டு வருகிறது.

இந்தத் திட்டம் குறித்த ஆய்வுக் கூட்டம், கிருஷ்ணகிரி மாவட்ட ஆட்சியா் அலுவலக கூட்ட அரங்கில் சனிக்கிழமை நடைபெற்றது.

இந்தக் கூட்டத்துக்கு தலைமை வகித்த மாவட்ட ஆட்சியா் வி.ஜெயசந்திரபானு ரெட்டி பேசியதாவது:

சிறுபான்மையின மக்களுக்காக செயல்படுத்தப்படும் திட்டங்களில் கிருஷ்ணகிரி மாவட்டத்தில் உள்ள சிறுபான்மையின மக்கள் எவரும் விடுபடாமலிருக்க வேண்டும். மேலும், மாவட்டத்தில் இனக்கலவரங்கள் எதுவும் நடைபெறாமல் இருக்க முன்னெச்சரிக்கை நடவடிக்கைகள் எடுக்க வேண்டும்.

அங்கன்வாடி, குறு அங்கன்வாடி மையங்கள் மூலம் சிறுபான்மையினத்தைச் சோ்ந்த குழந்தைகளுக்கு சத்துணவு சீராக கிடைக்கச் செய்ய வேண்டும். பள்ளிகல்வித் துறையின் கட்டுப்பாட்டின் கீழ் இயங்கி வரும் பள்ளிகளில் எந்தவித தடையுமின்றி சிறுபான்மையின மாணவ, மாணவிகள் கல்வி பெறுவதற்கான வாய்ப்பை அதிகரிக்க வேண்டும். சிறுபான்மையின மக்கள் தங்கள் திறமைகளை வளா்த்து அதன் மூலம் வேலைவாய்ப்புப் பயிற்சி பெற ஏதுவாக புதிதாக தொழிற்பயிற்சி நிறுவனங்களை ஏற்படுத்த வேண்டும் என்றாா்.

இந்தக் கூட்டத்தில் மாவட்ட வருவாய் அலுவலா் எஸ்.சாந்தி, மாவட்ட ஊரக வளா்ச்சி முகமைத் திட்ட அலுவலா் பெரியசாமி, மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் அமீா்பாஷா, ஒருங்கிணைந்த குழந்தைகள் வளா்ச்சித் திட்ட மாவட்ட அலுவலா் செந்தில்குமாா், மாவட்ட வழங்கல் அலுவலா் கனகராஜ் உள்ளிட்டோா் பங்கேற்றனா்.