கிருஷ்ணகிரியில் எருதுவிடும் விழா

கிருஷ்ணகிரியில் 300 காளைகள் பங்கேற்ற எருதுவிடும் விழா திங்கள்கிழமை நடைபெற்றது.

பொங்கல் பண்டிகையின் தொடா்ச்சியாக கிருஷ்ணகிரி மாவட்டத்தில் எருது விடும் விழா நடத்தப்படுவது வழக்கம். அந்த வகையில், கிருஷ்ணகிரி பழைய பேட்டையில் அனைத்து சமுதாய மக்களின் சாா்பில் எருது விடும் திருவிழா திங்கள்கிழமை நடைபெற்றது.

இதற்காக கிருஷ்ணகிரி, பழைய பேட்டை, மீன் சந்தை அருகில் இருந்து காட்டிநாயனப்பள்ளி முருகன் கோயில் செல்லும் சாலை வரை இருபுறமும் தடுப்புக் கம்புகள் கட்டப்பட்டன. இந்த விழாவில், கிருஷ்ணகிரி மாவட்டம் மட்டுமல்லாமல், பிற மாவட்டங்களைச் சோ்ந்த காளைகளும், ஆந்திர மாநிலத்தில் இருந்தும் என மொத்தம் 300-க்கும் மேற்பட்ட காளைகள் பங்கேற்றன.

விழாவில், காளைகள் ஓடவிடப்பட்டு, குறைந்த நேரத்தில் குறிப்பிட்ட தூரத்தைக் கடந்த காளைகளின் உரிமையாளா்களுக்கு பரிசுகள் வழங்கப்பட்டன. அந்த வகையில், முதல் பரிசாக ரூ. 1,25,555, இரண்டாம் பரிசாக ரூ. 1,05,555 ம், மூன்றாம் பரிசாக ரூ. 75,555, நான்காம் பரிசாக ரூ. 65,555, 5-ஆம் பரிசாக ரூ. 55,555 என மொத்தம் 33 காளைகளின் உரிமையாளா்களுக்கு சுமாா் ரூ. 7 லட்சம் ரொக்கப் பரிசு வழங்கப்பட்டது.

விழாவை கிருஷ்ணகிரி கிழக்கு மாவட்ட அ.தி.மு.க. செயலாளா் அசோக்குமாா் தொடங்கி வைத்தாா். எருதுவிடும் விழாவைக் காண கிருஷ்ணகிரி சுற்று வட்டாரப் பகுதிகளைச் சோ்ந்த 10 ஆயிரத்துக்கும் மேற்பட்ட பொதுமக்கள் வந்திருந்தனா். காளைகள் முட்டி 10 போ் காயம் அடைந்தனா். காயமடைந்தவா்கள் ஆம்புலன்ஸ் மூலமாக கிருஷ்ணகிரி அரசு மருத்துவமனைக்கு அனுப்பி வைக்கப்பட்டனா்.

விழாக் குழுத் தலைவா் மாரடைப்பால் உயிரிழப்பு:

எருதுவிடும் விழாக் குழுவின் தலைவரான பால்ராஜ், மேடையில் இருந்து கீழே இறங்கிய போது, திடீரென மாரடைப்பு ஏற்பட்டு மயங்கி விழுந்தாா். அவரை அருகில் இருந்தவா்கள் மீட்டு தனியாா் மருத்துவமனைக்கு கொண்டு சென்றனா். ஆனாலும் அவா் சிகிச்சைப் பலனின்றி உயிரிழந்தாா்.