நண்பனின் தங்கையை காதல் திருமணம் செய்தவா் கத்தியால் குத்திக்கொலை:பள்ளி மாணவா் உட்பட 3 போ் கைது

ஒசூா் அருகே நண்பரின் தங்கையை காதலித்து திருமணம் செய்தவரை கத்தியால் குத்தி கொலை செய்த பள்ளி மாணவா் உள்பட 3 பேரை போலீஸாா் கைது செய்தனா்.

கிருஷ்ணகிரி மாவட்டம், சூளகிரியை அடுத்த ஆ.கொத்தப்பள்ளி கிராமத்தைச் சோ்ந்தவா் சந்தோஷ் (23). குமுதேப்பள்ளியைச் சோ்ந்த முருகேசன் (26) ஆகிய இருவரும் பல ஆண்டுகளாக நண்பா்களாய் பழகி வந்தனா். சந்தோஷ், அடிக்கடி முருகேசன் வீட்டிற்குச் சென்று வந்த நிலையில் முருகேசனின் தங்கை மீனா உடன் காதல் ஏற்பட்டது. இந்த விஷயம் முருகேசனுக்கு தெரிய வந்த நிலையில் சந்தோஷும், முருகேசனும் எதிரிகளாக மாறினா்.

இந்த நிலையில் கடும் எதிா்ப்பையும் மீறி கடந்த 10 மாதங்களுக்கு முன்பு சந்தோஷ், மீனாவை காதல் திருமணம் செய்து கொண்டாா். அண்மையில் முருகேசன் வீட்டாா் நிலத்தை விற்க முயன்றபோது மீனாவின் சொத்தைப் பிரித்து தருமாறு கேட்டதாகக் கூறப்படுகிறது.

காதல் திருமணம் செய்ததால் கோபத்தில் இருந்த முருகேசன், சொத்தை கேட்டதால் ஆத்திரம் அடைந்தாா். முருகேசன், தங்கை மீனாவின் வீட்டிற்குச் சென்று உன்னை கொல்லாமல் விடமாட்டேன் என சந்தோஷை மிரட்டியும், அவ்வப்போது போனில் சண்டையிட்டும் வந்ததாகக் கூறப்படுகிறது.

இந்த நிலையில் ஞாயிற்றுக்கிழமை தியாகரசனப்பள்ளியில் உள்ள தொழிற்சாலையில் வேலை பாா்த்துவிட்டு வீடு திரும்பி கொண்டிருந்த சந்தோஷை, தியாகரசனப்பள்ளி கிராம மாந்தோப்பிற்கு அருகே முருகேசனும் அவரது நண்பா்களான குமாா் (24), 12 ஆம் வகுப்பு மாணவா் வின்சென்ட் குமாா் (18) ஆகிய மூவரும் வழிமறித்து தாக்கினாா்களாம். அவா்களிடம் இருந்து தப்பி ஓடிய சந்தோஷை துரத்திச் சென்ற முருகேசன் உள்ளிட்ட மூவரும் கத்தியால் சரமாரியாக குத்திக் கொலை செய்தாா்களாம்.

நிகழ்விடத்திற்கு வந்த சூளகிரி போலீஸாா் உடலை மீட்டு, தலைமறைவாக இருந்த முருகேசன், பள்ளி மாணவா் உள்பட 3 பேரைக் கைது செய்து தொடா்ந்து விசாரணை நடத்தி வருகின்றனா்.