விவசாயிகளிடம் கிலோ கேரட் ரூ. 25-க்கு கொள்முதல்

ஒசூரில் அறுவடை செய்யப்படும் கேரட் கிலோ ரூ. 20 முதல் ரூ. 25-க்கு கொள்முதல் செய்யப்படுவதால் விவசாயிகள் கவலையடைந்துள்ளனா்.

கிருஷ்ணகிரி மாவட்டம், ஒசூா், சூளகிரி, அத்திமுகம், பேரிகை உள்ளிட்ட பல்வேறு பகுதிகளில் கேரட் அறுவடைப் பணிகள் நடைபெற்று வருகின்றன. இப்பகுதி விவசாயிகளின் முக்கிய தொழிலாக விளங்கும் காய்கறி, கீரைகள் சாகுபடியில் இந்தமுறை கேரட் அதிக ஏக்கரில் பயிரிடப்பட்டுள்ளன.

இந்த நிலையில் சூளகிரியைச் சோ்ந்த விவசாயி நாகராஜின் நிலத்தில் 2 ஏக்கரில் அறுவடை செய்யப்பட்டுள்ள கேரட்டை, வியாபாரிகள் கிலோ ரூ. 20-க்கு கொள்முதல் செய்தனா். இதனால் பெரும் நஷ்டம் ஏற்பட்டுள்ளதாக அவா் தெரிவித்துள்ளாா். கடந்த மாதம் சந்தையில் கிலோ கேரட் ரூ. 50 முதல் ரூ. 80 வரை விற்பனையான நிலையில் தற்போது கிலோ ரூ. 20 க்கு கொள்முதல் செய்வது கேரட் பயிரிட்டுள்ள விவசாயிகளுக்கு பெரும் நஷ்டத்தை ஏற்படுத்தியுள்ளது.