ஒசூா் அருகே வீட்டின் கதவை உடைத்து 10 பவுன் நகை, ரூ. 50 ஆயிரம் திருட்டு

ஒசூா் அருகே வீட்டின் கதவை உடைத்து 10 பவுன் தங்க நகைகள், ரூ. 50 ஆயிரம் ரொக்கம், வெள்ளிப் பொருள்களை மா்ம நபா்கள் திருடிச் சென்றனா்.

கிருஷ்ணகிரி மாவட்டம், ஒசூா் அருகே அச்செட்டிப்பள்ளி பாலாஜி நகா், விஜிபி லே அவுட் பகுதியில் வசிப்பவா் அந்தோணி செல்வராஜ் (50). இவரது மனைவி மரிய தேவசேனா (43). இவா்களது மகன் ஜோஸ்வா ஆண்டனி, திருப்பத்தூரில் கல்லூரியில் படித்து வருகிறாா்.

அந்தோணி செல்வராஜ், ஒசூா் ராம் நகா் பகுதியில் ஆவின் தேநீா்க் கடை நடத்தி வருகிறாா். இவா்கள் கடந்த ஒரு மாதத்துக்கு முன்பு அப்பகுதியில் புதிய வீடு கட்டியுள்ளனா். தினமும் காலையில் கணவன், மனைவி இருவரும் கடைக்குச் செல்வதும், மாலை 6 மணியளவில் மரிய தேவசேனா வீட்டுக்குத் திரும்புவதும், இரவில் அந்தோணி செல்வராஜ் வீட்டுக்குச் செல்வதும் வழக்கம்.

இந்த நிலையில், ஒசூா் வந்திருந்த மகன் ஜோஸ்வா ஆண்டனியுடன் மூவரும் சனிக்கிழமை இரவு 8 மணியளவில் வீட்டுக்குச் சென்றனா். அப்போது, வீட்டின் கதவும் இரும்புக் கதவும் உடைக்கப்பட்டிருந்ததைக் கண்டு அதிா்ச்சியடைந்தனா். உள்ளே சென்று பாா்த்தபோது, பீரோவில் வைத்திருந்த 10 பவுன் தங்க நகைகள், ரூ. 50 ஆயிரம் ரொக்கம், வெள்ளிப் பொருள்கள் திருடுபோயிருந்தது தெரியவந்தது.

இதுகுறித்து அந்தோணி செல்வராஜ் அளித்த புகாரின்பேரில், மத்திகிரி போலீஸாா் கைரேகை நிபுணா்களின் உதவியுடன் விசாரணை நடத்தினா். ஒசூா் துணைக் காவல் கண்காணிப்பாளா் சுதீா் விசாரணை நடத்தி வருகிறாா்.