கனிமவளங்களை ஏற்றிச் செல்லும் வாகனங்களில் ஜிபிஎஸ் கருவி பொருத்தவிட்டால் நடைசீட்டு வழங்க இயலாது: ஆட்சியா்

கிருஷ்ணகிரி மாவட்டத்தில் வரும் 30-ஆம் தேதிக்குள் கனிமவளங்கள் ஏற்றிச் செல்லும் வாகனங்களில் ஜிபிஎஸ் கருவி பொருத்தி, எம்ஐஎம்ஏஎஸ் போா்ட்டலில் பதிவு செய்யவிட்டால் நடைசீட்டு வழங்க இயலாது என மாவட்ட ஆட்சியா் ச.தினேஷ்குமாா் தெரிவித்துள்ளாா்.

இதுகுறித்து அவா் செவ்வாய்க்கிழமை வெளியிட்ட செய்திக் குறிப்பு:

கிருஷ்ணகிரி மாவட்டத்தில் செயல்பட்டுவரும் குவாரிகள், சேமிப்புக் கிடங்குகளிலிருந்து கனிமங்களை எடுத்துச் செல்லும் வாகனங்களில் (ஏஐஎஸ் 140) ஜிபிஎஸ் கருவியை பொருத்தி, அவற்றை எம்ஐஎம்ஏஎஸ் (கனிம மேலாண்மை அமைப்பு) போா்ட்டலில் பதிவு செய்ய கடந்த ஆகஸ்ட் 31-ஆம் தேதி வரை காலஅவகாசம் வழங்கப்பட்டது. ஆனால், தற்போது வரை சுமாா் 6.75 சதவீத வாகனங்களில் மட்டுமே ஜிபிஎஸ் கருவி பொருத்தப்பட்டு, எம்ஐஎம்ஏஎஸ் போா்ட்டலில் பதிவு செய்யப்பட்டுள்ளது.

எனவே, வரும் 30-ஆம் தேதிக்குள் கனிமங்களை ஏற்றிச் செல்லும் அனைத்து வாகனங்களிலும் ஜிபிஎஸ் கருவி பொருத்தப்பட்டு, எம்ஐஎம்ஏஎஸ் போா்ட்டலில் பதிவு செய்ய வேண்டும். இல்லாவிட்டால், அக்டோபா் முதல் கனிமங்களை ஏற்றிச் செல்ல நடைச்சீட்டு வழங்க இயலாது என அவா் தெரிவித்துள்ளாா்.