ராசிபுரம் பள்ளிகளில் குழந்தைகள் தின விழா

ராசிபுரம் பகுதிகளில் உள்ள பள்ளிகளில் குழந்தைகள் தின விழா செவ்வாய்க்கிழமை கொண்டாடப்பட்டது.
 பாவை வித்யாஸ்ரம் பள்ளிகளில் நடைபெற்ற விழாவுக்கு பாவை கல்வி நிறுவனங்களின் தாளாளர் மங்கை நடராஜன் தலைமை வகித்து பேசுகையில், குடும்பத்திலும், சமுதாயத்திலும் உள்ள எதிர்மறையான விஷங்களை களைந்து, அமைதியை உருவாக்க வேண்டும். சவால்களை சந்தோஷத்தோடு எதிர்கொண்டு இறுக்கமான மனநிலையை மேற்கொள்ள வேண்டும். கல்வியிலும், கலையிலும் அடுத்த நிலைக்குச் செல்வதற்கு நம்முடைய அறிவை பக்குவப்படுத்தி வளர்த்துக்கொள்ள வேண்டும் என்றார்.
 தொடர்ந்து, பாவை வித்யாஸ்ரம் பள்ளிகளின் இயக்குநர் மூத்த முதல்வர் முனைவர்சி.சதீஸ், பாவை ஆலன் கெரியர் இன்ஸ்டியூட் நிறுவனத்தின் தலைமை பயிற்சியாளர் சந்தோஷ் ஆகியோர் குழந்தைகள் தின விழாவில் நடைபெற்ற பல்வேறு போட்டிகளில் வெற்றிபெற்ற மாணவ, மாணவியருக்கு பதங்கங்களையும், சான்றிதழ்களையும் வழங்கினர்.
 விழாவில் பாவை வித்யாஸ்ரம் பள்ளிகளின் ஆசிரியர்கள், மாணவ, மாணவியர் கலந்துகொண்டனர்.
 ராசிபுரம் வெற்றி விகாஸ் பப்ளிக் பள்ளியில் நடைபெற்ற விழாவில், பள்ளித் தலைவர் ஜி.வெற்றிச்செல்வன் தலைமை வகித்தார். பள்ளி முதல்வர் ஜெ.சுதர்சனா வரவேற்றார். இதில் பள்ளி மாணவ மாணவியர்களுக்கு செஸ், கேரம் போன்ற பல்வேறு போட்டிகள், கலை நிகழ்ச்சிகள் நடத்தப்பட்டன. மேலும், ஜவாஹர்லால் நேரு வாழக்கை வரலாறு குறித்து மாணவர்களுக்கு கூறப்பட்டது.
 ஸ்ரீவாசவி வித்யாலயா மெட்ரிக் மேல்நிலைப் பள்ளியில் நடைபெற்ற விழாவில், பள்ளி முதல்வர் சி.கிருஷ்ணராஜு வரவேற்றார். பள்ளித் தலைவர் பி.வி.ராஜகேகரன் தலைமை வகித்தார். செயலர் எஸ்.சுந்தரேஷ்வரகுப்தா பங்கேற்றுப் பேசினார். இதில் பள்ளி குழந்தைகள் ஜவஹர்லால் நேரு போல் வேடமணிந்து பங்கேற்றனர்.
 வித்யாநிகேதன் மெட்ரிக் மேல்நிலைப் பள்ளியில் நடைபெற்ற விழாவில், பள்ளி குழந்தைகள் நேரு போல் வேடமணிந்து வந்து பல்வேறு கலை நிகழ்ச்சிகள் நடத்தினர். மேலும் பள்ளி நிர்வாகம் சார்பில் குழந்தைகளுக்கு இனிப்பு, ரோஜா மலர்கள் வழங்கப்பட்டன. இதில் பல்வேறு நிர்வாகிகள், ஆசிரியர்கள் பலர் பங்கேற்றனர்.