விநாயகர் சதுர்த்தியையொட்டி பூக்களின் விலை உயர்வு

விநாயகர் சதுர்த்தி விழாவை முன்னிட்டு  பரமத்திவேலூர் தினசரி பூக்கள் ஏலச் சந்தையில் புதன்கிழமை நடைபெற்ற ஏலத்தில்  பூக்களின் விலை அதிகரித்தது.
பரமத்திவேலூர் சுற்றுவட்டாரப் பகுதிகள், கரூர் மாவட்டம், வேலாயுதம்பாளையம் சுற்றுவட்டாரப் பகுதிகளில் பல்வேறு வகையான பூக்கள் பயிர் செய்யப்பட்டுள்ளன.
இங்கு விளையும் பூக்களை விவசாயிகள் பரமத்தி வேலூரில் உள்ள பூக்கள் ஏலச் சந்தைக்குக் கொண்டு வந்து ஏலம் விடுகின்றனர். கடந்த வாரம் நடைபெற்ற ஏலத்தில் குண்டு மல்லிகை கிலோ ரூ. 500-க்கும், முல்லைப் பூ ரூ. 400-க்கும், சம்பங்கி ரூ. 300-க்கும், அரளி ரூ. 100-க்கும், ரோஜா கிலோ ரூ. 150-க்கும், செவ்வந்திப்பூ  ரூ. 100-க்கும்
ஏலம் போனது.
புதன்கிழமை நடைபெற்ற ஏலத்தில் குண்டு மல்லிகை கிலோ ரூ. 1,200-க்கும், முல்லை பூ கிலோ ரூ. 850-க்கும், சம்பங்கி கிலோ ரூ. 600-க்கும், அரளி ரூ. 200-க்கும், ரோஜா  ஒன்று ரூ. 200-க்கும், செவ்வந்திப்பூ ரூ. 200-க்கும் ஏலம் போனது. விநாயகர்  சதுர்த்தியை முன்னிட்டு பூக்களின் விலை உயர்ந்துள்ளதாக வியாபாரிகள் தெரிவித்தனர்.