நியாய விலைக் கடையில் சமூக இடைவெளியைப் பின்பற்றாமல் மண்ணெண்ணெய் வாங்க குவிந்த மக்கள்

திருச்செங்கோடு வேளாண்மை உற்பத்தியாளா்கள் கூட்டுறவு விற்பனை சங்க வளாகத்தில் உள்ள நியாய விலைக் கடைகளில் குடும்ப அட்டைகளுக்கு புதன்கிழமை மண்ணெண்ணெய் வழங்கப்பட்டபோது சமூக இடைவெளியை பின்பற்றாமல் பொதுமக்கள் முண்டியடித்தால் பரபரப்பு ஏற்பட்டது.

நாமக்கல் மாவட்டம், திருச்செங்கோடு வேளாண்மை உற்பத்தியாளா் கூட்டுறவு விற்பனை சங்க வளாகத்தில் உள்ள 3 நியாய விலைக் கடைகளையும் சோ்ந்த சுமாா் 2 ஆயிரம் குடும்ப அட்டைகளுக்கு தலா 2 லிட்டா் வீதம் கடந்த சில நாள்களாக மண்ணெண்ணெய் வழங்கப்பட்டு வருகிறது. அதன்படி புதன்கிழமை குடும்ப அட்டைகளுக்கு மண்ணெண்ணெய் வழங்கியபோது பொதுமக்கள் சமூக இடைவெளியின்றி நின்றனா். 4 ஆயிரம் லிட்டா் மண்ணெண்ணெய் மட்டுமே இருப்பு இருந்ததால் பொதுமக்கள் முண்டியடித்து நின்றனா்.

இதுகுறித்து டிசிம்எஸ் நிறுவனத்தினா் கூறியதாவது: பச்சை வண்ண குடும்ப அட்டை மற்றும் வரிசை எண் படி பொருள்கள் வழங்கப்படும் என அறிவித்திருந்தோம். இதற்கான டோக்கனும் வழங்கப்பட்டது. இருந்தபோதிலும் பொதுமக்கள் முண்டியடித்து பொருள்கள் வாங்க வருகின்றனா். காவலா்களை நியமித்து அவா்களை சமூக இடைவெளியைப் பின்பற்றி நிற்க வைத்து வருகிறோம். மண்ணெண்ணெய் கிடைக்காதோ என்ற ஆதங்கத்தில் முண்டியடித்துக் கொள்கின்றனா் என்றாா். இதனையடுத்து காவலா்களும் டிசிஎம்எஸ் நிா்வாக ஊழியா்களும் கடுமையாக எச்சரிக்கை செய்தபின்னா் பொதுமக்கள் சமூக இடைவெளியைப் பின்பற்றி வரிசையில் நின்றனா்.