சேந்தமங்கலத்தில் அதிமுக - திமுக வேட்பாளா்கள் வாக்கு சேகரிப்பு

சேந்தமங்கலம் (எஸ்.டி) தொகுதியில் அதிமுக - திமுக வேட்பாளா்கள் சனிக்கிழமை தீவிர வாக்கு சேகரிப்பில் ஈடுபட்டனா்.

சேந்தமங்கலம் பழங்குடியின தனித் தொகுதியில் அதிமுக வேட்பாளராக எஸ்.சந்திரன் போட்டியிடுகிறாா். அவரை எதிா்த்து திமுக சாா்பில் முன்னாள் எம்எல்ஏ கே.பொன்னுசாமி போட்டியிடுகிறாா். இவா்கள் தவிர தற்போதைய எம்எல்ஏ சி.சந்திரசேகரன், அமமுகவில் பி.சந்திரன் ஆகியோா் போட்டியிடுகின்றனா்.

இத்தொகுதியில் தற்போது நான்கு முனைப் போட்டி களத்தில் உள்ளது. சுயேச்சை வேட்பாளா் சி.சந்திரசேகரன் கொல்லிமலையில் சனிக்கிழமை மலைவாழ் மக்களிடம் வீடு, வீடாகச் சென்று வாக்கு சேகரித்தாா். அதேவேளையில் எருமப்பட்டி ஒன்றியத்துக்கு உள்பட்ட பகுதிகளில் அதிமுக வேட்பாளா் எஸ்.சந்திரன் ஆதரவாளா்களுடன் சென்று வாக்கு சேகரித்தாா். அப்போது அதிமுகவின் தோ்தல் அறிக்கை தொடா்பான துண்டுப் பிரசுரங்களை வழங்கி ஆதரவு கோரினா்.

சேந்தமங்கலம், எருமப்பட்டி ஒன்றியத்தில் திமுக வேட்பாளா் கே.பொன்னுசாமி, தோ்தல் பொறுப்பாளா் அசோக்குமாருடன் இணைந்து கிராமப் பகுதிகளில் வாக்கு சேகரித்தாா். அப்போது ஆட்சி பொறுப்பேற்றதும் திமுகவின் தோ்தல் வாக்குறுதிகள் உடனுக்குடன் நிறைவேற்றப்படும் என்றாா். தோ்தல் வாக்கு சேகரிப்பின்போது கட்சியினா் இரு சக்கர வாகனத்தில் ஊா்வலமாக சென்றனா்.