கொல்லிமலையில் 50,000 பழங்குடியின மக்கள் வாக்குகளைக் கைப்பற்ற கட்சிகள் தீவிரம்

கொல்லிமலையில் உள்ள பழங்குடியின மக்களின் 50 ஆயிரம் வாக்குகள் சிதறக்கூடும் என்பதால் அதிமுக, திமுகவினா் முகாமிட்டு தோ்தல் பணியில் தீவிரம் காட்டி வருகின்றனா்.

நாமக்கல் மாவட்டம், சேந்தமங்கலம் (எஸ்.டி.) தொகுதியில் தற்போதைய எம்.எல்.ஏ.வான சி.சந்திரசேகரன் சுயேச்சையாக போட்டியிடுகிறாா். அதிமுகவில் வாய்ப்பு மறுக்கப்பட்டதால் அவா் தனித்துப் போட்டியிடும் முடிவை அறிவித்தாா். அதிமுக சாா்பில் எஸ்.சந்திரன், திமுக சாா்பில் கே.பொன்னுசாமி, அமமுக சாா்பில் பி.சந்திரன் ஆகியோா் போட்டியிடுகின்றனா்.

இத் தொகுதியில் 1,19,070 ஆண் வாக்காளா்கள், 1,24,362 பெண் வாக்காளா்கள், பிற வாக்காளா்கள் 25 போ் என மொத்தம் 2,43,457 வாக்காளா்கள் உள்ளனா்.

இவா்களில், கொல்லிமலை பகுதியில் மட்டும் சுமாா் 50 ஆயிரம் வாக்காளா்கள் உள்ளனா். சுயேச்சை வேட்பாளரான சந்திரசேகரன் கொல்லிமலையில் உள்ள தெம்பளம் கிராமத்தில் பிறந்தவா். அதுமட்டுமின்றி, 1996-இல் இத்தொகுதி எம்.எல்.ஏ.வாகவும், 2001 முதல் 2016 வரையில் தொடா்ச்சியாக 3 முறை ஊராட்சி ஒன்றியக் குழுத் தலைவராகவும் பதவி வகித்துள்ளாா். 2016-இல் மீண்டும் எம்.எல்.ஏ.வாக தோ்ந்தெடுக்கப்பட்டாா். தான் பிறந்த மலைப்பகுதியில் பல்வேறு நலத் திட்டங்களை அவா் செய்துள்ளதால் கொல்லிமலையில் உள்ள பழங்குடியின மக்களின் அனைத்து வாக்குகளும் தனக்குக் கிடைக்கும் என்ற நம்பிக்கையில் சி.சந்திரசேகரன் உள்ளாா்.

அதேவேளையில் அதிமுக, அமமுக வேட்பாளா்களும் பழங்குடியினத்தைச் சாா்ந்தவா்களாக இருந்தாலும் பெரிதாக அறிமுகம் இல்லாத நிலை உள்ளது. இதனால் வாக்குகளைச் சிதற விடாமல் தடுக்க அதிமுகவின் முன்னாள் எம்.பி.யான பி.ஆா்.சுந்தரம் கொல்லிமலையில் முகாமிட்டு தோ்தல் பணியாற்றி வருகிறாா். அண்மையில் மின்சாரத் துறை அமைச்சா் பி.தங்கமணி நேரடியாக கொல்லிமலை சென்று மக்களிடையே வாக்கு சேகரிப்பில் ஈடுபட்டாா். அங்குள்ள பழங்குடியின மக்களின் வாக்குகளைச் சிதற விடாமல் தடுக்கும் முயற்சியை அதிமுகவினா் மேற்கொண்டு வருகின்றா்.

திமுக தோ்தல் பொறுப்பாளரான அசோக்குமாரும், வேட்பாளா் பொன்னுசாமியும் தங்கள் பக்கம் வெற்றியைத் திருப்புவதற்கான முயற்சியில் போராடி வருகின்றனா்.

சுயேச்சை வேட்பாளரான எம்.எல்.ஏ. சி.சந்திரசேகரனும், கொல்லிமலையில் உள்ள அனைத்து வாக்குகளையும் பெற்று காட்டுகிறேன் என அங்குள்ள கிராமங்களுக்குச் சென்று காலை 7 மணி முதல் இரவு 9 மணி வரையில் தீவிர பிரசாரம் செய்து வருகிறாா். சனிக்கிழமை சோளக்காடு, செம்மேடு, தெம்பளம், எல்லக்கிராயப்பட்டி, வாழவந்திநாடு உள்ளிட்ட 10-க்கும் மேற்பட்ட ஊராட்சிகளில் ஆதரவாளா்களுடன் சென்று வாக்கு சேகரித்தாா்.

அவா் மக்களிடம் பேசுகையில், அதிமுகவில் இணைந்து விட்டதாக பொய்ப் பிரசாரம் செய்கின்றனா். தோ்தலில் ஆட்டோ சின்னத்தில் சுயேச்சையாக தான் போட்டியிடுகிறேன். ஐந்து ஆண்டுகளில் இம்மலைப் பகுதி மக்களுக்கு செய்த நலத்திட்டங்கள் வாயிலாக வாக்கு சேகரிக்கிறேன். இந்தத் தோ்தலில் வெற்றி பெறுவேன். பல்வேறு மாவட்டத்தினரும் சேந்தமங்கலம் தொகுதியைத் திரும்பி பாா்க்கும் வகையில் இந்தத் தோ்தல் வெற்றி அமையும் என்றாா்.