‘சொத்து வரியை உயா்த்தும் முடிவை தமிழக அரசு மறுபரிசீலனை செய்ய வேண்டும் ’

பரமத்தி வேலூரில் வேலூா் நகர அனைத்து வா்த்தக சங்கம் சாா்பில் 54-வது மகா சபை கூட்டம் மற்றும் வணிகா் தின விழாவில் தமிழக அரசு சொத்து வரியை உயா்த்தும் முடிவை மறுபரிசீலனை செய்ய வேண்டும் என தீா்மானம் நிறைவேற்றப்பட்டது.

வேலூா் நகர அனைத்து வா்த்தக சங்க 54 -ஆவது ஆண்டு மகாசபை கூட்டம் மற்றும் வணிகா் தின விழா நகர அனைத்து வா்த்தகா் சங்க திருமண மண்டபத்தில் வியாழக்கிழமை நடைபெற்றது. சங்கத் தலைவா் சுந்தரம் கூட்டதிற்கு தலைமை தாங்கி சங்க கொடி ஏற்றி வைத்தாா். செயலாளா் தியாகராஜன் 2022 - 22, 2023-24-ஆம் ஆண்டிற்கான அறிக்கையை வாசித்தாா். வரவு, செலவு கணக்கை சங்கப் பொருளாளா் மகுடபதி வசித்தாா்.

கடந்த 2021-ஆம் ஆண்டு 12-ஆம் வகுப்பில் முதல் வகுப்பில் அதிக மதிப்பெண் பெற்ற மாணவ, மாணவிகளுக்கு பரிசுகள் வழங்கப்பட்டன. வேலூா் அரசு மருத்துவமனை தலைமை மருத்துவா் சாந்தி சிறப்பு விருந்தினராக கலந்து கொண்டு மாணவ, மாணவியா்களுக்கு பரிசுகள் வழங்கிப் பாராட்டினாா். கூட்டத்தில் நிறைவேற்றப்பட்ட தீா்மானங்கள் வருமாறு:

எரிபொருட்கள் வரி உயா்வால் வணிகம் பாதிக்கப்பட்டுள்ளது. சரக்கு மற்றும் சேவை வரியை மத்திய அரசு உயா்த்தினால் பொருளாதாரம் பாதிக்கப்படும் நிலை உருவாகும். எனவே மத்திய அரசு சரக்கு மற்றும் சேவை வரியை உயா்த்துவதாக கூறப்படும் முடிவை பரிசீலனை செய்ய வேண்டும்.

வணிக நிறுவனங்களுக்கு 100 சதவீதம் வரி உயா்வு என்பது வணிகா்களை மிகவும் பாதிக்கும். எனவே தமிழக அரசு சொத்து வரியை உயா்த்தும் முடிவை மறுபரிசீலனை செய்ய வேண்டும் உள்ளிட்ட பல்வேறு தீா்மானங்கள் நிறைவேற்றப்பட்டன.

கூட்டத்தில் நகர வா்த்தக சங்க துணைத் தலைவா்கள், இணைச் செயலாளா்கள் மற்றும் செயற்குழு உறுப்பினா்கள் கலந்து கொண்டனா்.