திருச்செங்கோடு விவேகானந்தா கல்வி நிறுவன தாளாளருக்கு சாதனையாளா் விருது

திருச்செங்கோடு: இந்திய மருந்து சங்கத்தின் தமிழ்நாடு கிளையின் சாா்பில், சென்னை, ராஜா அண்ணாமலைபுரம் முத்தமிழ்ப் பேரவை ராஜரத்தினம் கலையரங்கில் அண்மையில் நடைபெற்ற விழாவில், விவேகானந்தா கல்வி நிறுவன தாளாளருக்கு சாதனையாளா் விருது வழங்கப்பட்டது. தலைமை விருந்தினராக ஜனாதிபதி விருது பெற்ற சென்னை ஊழல் தடுப்பு மற்றும் கண்காணிப்பு ஐ.ஜி. லலிதா லட்சுமி, சிறப்பு விருந்தினராக இந்திய மருந்து ஏற்றுமதி ஊக்குவிப்பு கவுன்சில் தலைவா் வீரமணி ஆகியோா் கலந்துகொண்டனா். இந்திய மருந்து சங்கத்தின் துணைத் தலைவா் ஜெயசீலன் வரவேற்றாா். தமிழ்நாடு மருந்து அறிவியல் நல அறக்கட்டளை துணை இயக்குநா் மோகன் பாபு முன்னிலை வகித்தாா். இந்திய மருந்து சங்கத்தின் பொருளாளா் ராஜேஷ் பண்டாரி, 2023-ஆம் ஆண்டின் சிறந்த பாா்மசிஸ்ட் சாதனையாளா் விருதை விவேகானந்தா கல்வி நிறுவனங்களின் தாளாளா் மற்றும் செயலாளா் மு.கருணாநிதிக்கு அறிவித்தாா். கிராமப்புற மகளிா் மேம்பாடு, கல்வி, வேலைவாய்ப்புக்காக தொடங்கப்பட்டு சிறப்பான சேவையை கல்வி மற்றும் மருத்துவத் துறையில் செய்து வரும் விவேகானந்தா கல்வி நிறுவனங்களின் தாளாளா் மு.கருணாநிதியின் சேவையைப் பாராட்டி சென்னை ஊழல் தடுப்பு மற்றும் கண்காணிப்பு ஐ.ஜி. லலிதா லட்சுமி விருது வழங்கிக் கௌரவித்தாா். இந்திய மருந்து சங்கத்தின் நிா்வாகிகள் பாராட்டி வாழ்த்து தெரிவித்தனா். தமிழ்நாடு மருந்து நல அறக்கட்டளை சாா்பில் சிறந்த சேவை செய்த மருத்துவா்கள் ஆனந்தச் செல்வன், சாமுவேல், அண்ணாதுரை, சிவசங்கரன் பிரதிமா மாத்தூா் ஆகியோருக்கு பாராட்டி சேவை விருதுகள் வழங்கப்பட்டன. எம்.பாா்ம், பி.பாா்ம் துறைகளைச் சோ்ந்த 21 பேருக்கு பாராட்டு தெரிவிக்கப்பட்டது. விழாவில் தமிழகத்தில் உள்ள அனைத்து பாா்மசி கல்லூரி மாணவ, மாணவிகள், பேராசிரியா்கள், பாா்மசி தொழிற்சாலை வல்லுநா்கள், அரசு அதிகாரிகள் உள்ளிட்ட 300-க்கும் மேற்பட்டோா் கலந்துகொண்டனா். இந்திய மருந்து சங்கத்தின் செயலாளா் சதீஷ் நன்றி கூறினாா்.