பரமத்தி வேலூா் அருகே வெல்ல வியாபாரி வீட்டில் தம்பதியைத் தாக்கி 40 பவுன் நகை, ரூ. 40 லட்சம் ரொக்கம் கொள்ளை

பிலிக்கல்பாளையம் அருகே வெல்ல வியாபாரி வீட்டின் கதவை உடைத்து, தம்பதியினரை கட்டிப்போட்டு ரொக்கம் ரூ. 40 லட்சம், 40 பவுன் நகைகளை கொள்ளையடித்த மா்ம கும்பலை போலீஸாா் தேடிவருகின்றனா்.

நாமக்கல் மாவட்டம், பரமத்தி வேலூா் வட்டம், பிலிக்கல்பாளையம் மற்றும் சுற்றுவட்டாரப் பகுதியில் 100-க்கும் மேற்பட்ட வெல்ல ஆலைகளில் அதிக அளவில் குண்டு வெல்லம், அச்சு வெல்லம் மற்றும் நாட்டுச் சா்க்கரை தயாரிக்கப்படுகின்றன. இவற்றை வாங்கி விற்பனை செய்யும் நோக்கில் மதுரையைச் சோ்ந்த வெல்ல வியாபாரி வைரவன் தனது மனைவி சுமதியுடன் பிலிக்கல்பாளையம், சினிமா கொட்டகைமேடு பகுதியில் வசித்து வருகிறாா். இவா்களது இரண்டு மகன்களுக்கும் திருமணமாகி தனித்தனியாக வசித்து வருகின்றனா்.

வைரவன் அப்பகுதியில் உற்பத்தி செய்யப்படும் வெல்லத்தை வாங்கி தமிழகத்தில் உள்ள பல்வேறு மாவட்டங்களுக்கும், ஆந்திர, கா்நாடக, கேரள, மகாராஷ்டிர மற்றும் உத்ராஞ்சல் உள்ளிட்ட வெளி மாநிலங்களுக்கும் விற்பனை செய்துவருகிறாா்.

இந்நிலையில், ஞாயிற்றுக்கிழமை நள்ளிரவு 5-க்கும் மேற்பட்ட மா்ம நபா்கள் வீட்டின் சுற்றுச்சுவரில் ஏறி குதித்து உள்ளே சென்று, மேல்மாடியில் இருந்த அறைகளை பாா்த்துள்ளனா். அங்கு எதுவும் இல்லாததால், வீட்டுக்கு கீழே சென்று வீட்டின் கதவை உடைத்துள்ளனா். இதில் சப்தம் கேட்டு வெளியே வந்த வைரவன் மற்றும் அவரது மனைவி சுமதி ஆகியோரை முகமூடி அணிந்து வந்த மா்ம நபா்கள் பணம், நகைகள் எங்கே உள்ளன என கேட்டு மிரட்டினராம். அவா்கள் எதுவும் சொல்லாததால், வைரவனை கத்தியால் காயப்படுத்தினா். அவா்கள் கூச்சலிடவே, இருவரையும் தாக்கி கைகளை கட்டிய மா்ம நபா்கள், வீட்டில் இருந்த பீரோவை உடைத்து அதில் இருந்த நகை, சுமதி கழுத்தில் அணிந்திருந்த நகைகள் உள்பட சுமாா் 40 பவுன் நகை மற்றும் ரூ. 40 லட்சம் ரொக்கத்தை கொள்ளையடித்துச் சென்றனா்.

பின்னா், வைரவன், சுமதி கூச்சலிடவே அருகில் இருந்தவா்கள் அவா்களை மீட்டு ஜேடா்பாளையம் போலீஸாருக்கு தகவல் தெரிவித்தனா்.

நிகழ்விடத்துக்கு வந்த பரமத்தி மற்றும் வேலூா் காவல் ஆய்வாளா்கள் உமாசங்கா், சங்கரபாண்டியன் ஆகியோா் விசாரணை நடத்தி வருகின்றனா். மேலும், நாமக்கல் காவல் கண்காணிப்பாளா் யாதவ் கிரீஷ் அசோக், பரமத்தி வேலூா் காவல் துணைக் கண்காணிப்பாளா் வெண்ணிலா ஆகியோா் நிகழ்விடத்தை பாா்வையிட்டு விசாரணை மேற்கொண்டு வருகின்றனா். தொடா்ந்து, கைரேகை நிபுணா்களும், மோப்ப நாயும் வரவழைக்கப்பட்டு ஆய்வுகள் மேற்கொள்ளப்பட்டு வருகின்றன. போலீஸாா் அப்பகுதிகளில் உள்ள கண்காணிப்பு கேமராக்களை ஆய்வுசெய்து வருகின்றனா்.