இருசக்கர வாகனம் மீது லாரி மோதியதில் பெண் சாவு

சேலத்தில் இருசக்கர வாகனம் மீது லாரி மோதிய சம்பவத்தில் பெண் உயிரிழந்தார்.
சேலம் மாவட்டம், மேச்சேரியைச் சேர்ந்த பூபதியின் மனைவி செல்வி (45) . இவரது உறவினர் 
சீலநாயக்கன்பட்டியில் உள்ள தனியார்  மருத்துவமனையில் சிகிச்சை பெற்று வருகிறார். அவரைப் பார்க்க செல்வி தனது உறவினர் பாலகிருஷ்ணன் என்பவருடன் இருசக்கர வாகனத்தில் ஞாயிற்றுக்கிழமை காலை சேலம் வந்தார். கொண்டலாம்பட்டி புறவழிச்சாலை அருகில் இருசக்கர வாகனம் வந்த போது பின்னால் வந்த கேரள மாநில லாரி  மோதியது. இதில் செல்வியும், பாலகிருஷ்ணனும் கீழே விழுந்தனர்.அப்போது லாரியின் பின்  சக்கரம் செல்வியின் மீது ஏறியதில் அவர் நிகழ்விடத்திலேயே  இறந்தார்.
இந்த விபத்தால் அப்பகுதியில் போக்குவரத்து பாதிக்கப்பட்டது. இதையறிந்த கொண்டலாம்பட்டி காவல் ஆய்வாளர் ரவிக்குமார் மற்றும் காவலர்கள் சம்பவத்துக்கு வந்து செல்வியின் சடலத்தை மீட்டு பிரேதப் பரிசோதனைக்காக சேலம் அரசு தலைமை மருத்துவமனைக்கு அனுப்பி வைத்தனர்.விபத்துக்கு காரணமான கேரள மாநிலம் மலப்புரத்தைச் சேர்ந்த லாரி ஓட்டுநர் ஜெயந்த் என்பவரை போலீஸார் கைது செய்து விசாரித்து வருகின்றனர்.
கொண்டலாம்பட்டி புறவழிச்சாலை பகுதியில் திருச்சி, கோவை மற்றும் பல்வேறு ஊர்களுக்கு பேருந்துகள் மற்றும் லாரிகள் சென்று வருகின்றன. இவ்வழியில் காலை மற்றும் மாலை நேரங்களில் போக்குவரத்து நெரிசல் ஏற்படுகிறது. வாகனங்கள் அதிக வேகத்தில் சென்று வருவதால் அடிக்கடி சாலை விபத்துகளும் ஏற்படுகின்றன .இதைத் தடுக்க புறவழிச்சாலை பகுதியில் போக்குவரத்து சிக்னல்கள் மற்றும் வேகத்தடைகள் அமைக்க வேண்டும் என பொதுமக்கள் வலியுறுத்தி உள்ளனர்.