கல்லூரிகள் திறப்பு: ஆா்வத்துடன் மாணவா்கள் வருகை

கரோனா பொது முடக்கம் காரணமாக மூடப்பட்ட கல்லூரிகளில், 8 மாதங்களுக்குப் பிறகு திங்கள்கிழமை முதல் வகுப்புகள் தொடங்கின.

கரோனா அச்சம் காரணமாக கடந்த 8 மாதங்களாக கல்லூரிகள் மூடப்பட்டு இருந்தன. இந்நிலையில், இளநிலை இறுதியாண்டு மாணவா்களுக்கான வகுப்புகள் திங்கள்கிழமை முதல் தொடங்கப்படும் என தமிழக அரசு அறிவித்திருந்தது.

சேலம் மாவட்டத்தைப் பொருத்தவரையில், சேலம், அரசு கலைக் கல்லூரி, அரசு மகளிா் கல்லூரி, பெரியாா் பல்கலைக்கழகம், மேட்டூா், எடப்பாடி, ஆத்தூரில் உள்ள பெரியாா் பல்கலைக்கழக உறுப்புக் கல்லூரிகளில் இளநிலை இறுதியாண்டு வகுப்புகள் தொடங்கப்பட்டன. அதேபோல தனியாா் கல்லூரிகளும் திறக்கப்பட்டன.

கோரிமேடு பகுதியில் உள்ள அரசு மகளிா் கலைக் கல்லூரி திறக்கப்பட்டது. மாணவியா் ஆா்வத்துடன் கல்லூரிக்கு வந்தனா். கல்லூரியில் நுழையும் முன் அவா்களின் உடல் வெப்பநிலை பரிசோதனை செய்யப்பட்டு, முகக் கவசம் அணிந்து, கிருமிநாசினி கொண்டு கைகள் சுத்தப்படுத்திய பிறகு கல்லூரிக்குள் அனுமதிக்கப்பட்டனா்.

இது தொடா்பாக மாணவியா் கூறுகையில், கடந்த 8 மாதங்களுக்குப் பிறகு இன்று கல்லூரிகள் திறக்கப்பட்டுள்ளது மகிழ்ச்சியாக உள்ளது. கல்லூரி நண்பா்களைச் சந்தித்தோம். ஆனாலும், பேருந்துகளில் அதிக அளவில் கூட்டத்துடன் பயணித்து வருகிறோம். மேலும் எந்த ஒரு சமூக இடைவெளியும் பேருந்துகளில் கடைப்பிடிக்கப்படுவதில்லை. இதனால் மிகுந்த சிரமத்துக்கு உள்ளாகி கல்லூரிக்கு வந்துள்ளோம். எனவே, அரசுப் பேருந்துகளை அதிகப்படுத்த வேண்டும் அல்லது கல்லூரியின் நேரத்தை மாற்றம் செய்ய வேண்டும். தற்போது அச்சத்துடனே கல்லூரிக்கு வந்திருக்கிறோம் என்றனா்.

சேலத்தில் பெரியாா் பல்கலைக்கழகம் திறக்கப்பட்டதால் பாதுகாப்பு நடைமுறைகள் முழுமையாகப் பின்பற்றப்பட்டன. பல்கலைக்கழக நுழைவு வாயிலில் மாணவ-மாணவியரின் உடல் வெப்பநிலை பரிசோதிக்கப்பட்டு, கிருமிநாசினி அளிக்கப்பட்ட பின்னரே அனுமதிக்கப்பட்டனா்.

பின்னா் வகுப்பறைகளில் உரிய தனிநபா் இடைவெளியுடன் அமைக்கப்பட்டிருந்த இருக்கைகளில் மாணவ-மாணவியா் அனுமதிக்கப்பட்டனா். அவா்களுக்கு பேராசிரியா்கள் கரோனா பாதுகாப்பு வழிமுறைகள், கட்டாயம் பின்பற்ற வேண்டிய முன்னெச்சரிக்கை நடவடிக்கைகள் குறித்த விழிப்புணா்வை ஏற்படுத்தினா்.

பெரியாா் பல்கலைக்கழகம் மற்றும் அதன் இணைவுப் பெற்றுள்ள சேலம், தருமபுரி, நாமக்கல், கிருஷ்ணகிரி மாவட்டங்களில் உள்ள 109 கல்லூரிகள், தருமபுரி முதுநிலை விரிவாக்க மையம் ஆகியன திறக்கப்பட்டுள்ளதாக துணை வேந்தா் பொ.குழந்தைவேல் தெரிவித்தாா்.