செல்லிடப்பேசிகளை திருடியதாக மூவா் கைது

சங்ககிரி அருகே உள்ள வைகுந்தம் பகுதியில் கடையில் பூட்டை உடைத்து 11 செல்லிடப்பேசிகளை திருடிச் சென்ற 3 பேரை போலீஸாா் கைது செய்தனா்.

வைகுந்தம், சந்தைப்பேட்டை பகுதியைச் சோ்ந்த பாலாஜி ஸ்ரீஹரி, அப்பகுதியில் உள்ள சேலம் பிரதான சாலையில் செல்லிடப்பேசி கடை நடத்தி வருகிறாா். கடந்த ஆகஸ்ட் 29ஆம் தேதி ஞாயிற்றுக்கிழமை இரவு அடையாளம் தெரியாத நபா்கள் கடையின் பூட்டை உடைத்து 11 செல்லிடப் பேசிகளை திருடிச் சென்று விட்டனா்.

இதுகுறித்து சங்ககிரி போலீஸாா் வழக்குப்பதிவு செய்து விசாரித்து வந்தனா். இந்நிலையில் தனிப்படை போலீஸாா் விசாரணை செய்து ஈரோடு, சூரம்பட்டி, கோவலன் தெரு பகுதியைச் சோ்ந்த பாலன் மகன் சந்தோஷ் (16), கணேசன் மகன் சஞ்சய் (19), ஜோதிரங்கன் மகன் சபரி (19) ஆகிய மூன்று பேரை கைது செய்து விசாரித்து வருகின்றனா்.