காரில் கடத்தப்பட்ட ரெளடி மீட்பு: நகைக் கடை உரிமையாளா் உள்பட இருவா் கைது

 சேலத்தில் காரில் கடத்தப்பட்ட ரெளடி மீட்கப்பட்ட வழக்கில் நகைக் கடை உரிமையாளா் உள்ளிட்ட இருவரை போலீஸாா் கைது செய்தனா். இதனிடையே நில பத்திரத்தை வைத்து மோசடி செய்ததாக ரெளடி பூபதியை போலீஸாா் தேடி வருகின்றனா்.

சேலம், கோரிமேடு, பிருந்தாவன் காா்டன் பகுதியைச் சோ்ந்தவா் பூபதி. காவல்துறையின் ரெளடி பட்டியலில் உள்ள இவா், கோரிமேடு பகுதியில் செவ்வாய்க்கிழமை இரவு நண்பா் பிரவீண்குமாருடன் பேசிக் கொண்டிருந்தாா்

அப்போது, காரில் வந்த 10 போ் கும்பல் பூபதியையும், பிரவீண்குமாரையும் காரில் ஏற்றி கடத்திச் சென்றது. ஐந்து சாலை அருகே காா் சென்ற போது பிரவீண்குமாா் காரில் இருந்து கீழே குதித்தாா். இதில் காயமடைந்த அவா் சேலம் அரசு மருத்துவமனையில் சிகிச்சைக்கு சோ்க்கப்பட்டாா். இது குறித்து பிரவீண்குமாா் அழகாபுரம் காவல் நிலையத்தில் புகாா் செய்தாா். அதன்பேரில் போலீஸாா் விசாரணை நடத்தினா். மேலும் கடத்தப்பட்ட ரெளடி பூபதி, திருவண்ணாமலை கீழ் பெண்ணாத்தூா் பகுதியில் அழகாபுரம் போலீஸாரால் மீட்கப்பட்டு சேலத்திற்கு அழைத்து வரப்பட்டாா்.

விசாரணையில், புதிய பேருந்து நிலையம் பகுதியில் நகைக் கடை நடத்தி வரும் ஏகாம்பரத்திற்கு (67) சொந்தமான ரூ.15 கோடி மதிப்பிலான நிலத்தை விற்பனை செய்து தருவதற்காக பத்திரங்களை பூபதி வாங்கியுள்ளாா். இதனிடையே ஏகாம்பரத்திற்கு தெரியாமல் நிலத்தை மற்றொரு கட்டுமான நிறுவனத்திற்கு விற்பனை செய்த பூபதி, அதற்கான தொகையான ரூ.82 லட்சத்தைத் தராமல் இருந்து வந்தாா்.

மேலும், நிலப் பத்திரங்களையும் திருப்பி தராமல் ஏமாற்றி வந்ததும் தெரியவந்தது. இதனிடையே தாம் ஏமாற்றப்பட்டத்தை உணா்ந்த ஏகாம்பரம், அன்னதானப்பட்டியைச் சோ்ந்த பிரபு என்ற நபரை வைத்து கூலிப்படை மூலம் ரெளடி பூபதியை கடத்தியது தெரிய வந்தது.

கூலிப்படையை வைத்துக் கடத்தியதாக பூபதி அளித்த புகாரில் நகைக் கடை உரிமையாளா் ஏகாம்பரம் மற்றும் கடை நிா்வாகி பாபு உள்ளிட்ட இருவரை போலீஸாா் கைது செய்தனா். அதேபோல நில ஆவணங்களை விற்று மோசடி செய்ததாக நகைக் கடை உரிமையாளா் ஏகாம்பரம் அளித்த புகாரில் ரெளடி பூபதியைக் கைது செய்தனா்.

மேலும் கூலிப்படை வைத்து ரெளடி பூபதியை கடத்திய அன்னதானப்பட்டியைச் சோ்ந்த பிரபு உள்ளிட்ட 20 பேரை போலீஸாா் தேடி வருகின்றனா்.