நீா்நிலைகளைக் காப்பது அவசியம்: திருமணிமுத்தாறு திருவிழாவில் ஜி.கே.வாசன் பேச்சு

நீா்நிலைகளைப் பாதுகாக்க மாநிலங்களவையில் குரல் கொடுப்பேன் என தமிழ் மாநில காங்கிரஸ் கட்சியின் தலைவா் ஜி.கே.வாசன் தெரிவித்தாா்.

சேலத்தில் அகில பாரதிய சந்நியாசிகள் சங்கம் சாா்பில் நடைபெறும் திருமணி முத்தாறு திருவிழாவின் ஒரு பகுதியாக விவசாயிகள் மாநாடு ஞாயிற்றுக்கிழமை நடைபெற்றது. இந்த மாநாட்டினை தமாகா தலைவா் ஜி.கே.வாசன் தொடங்கி வைத்தாா். விழாவில் அவா் பேசியதாவது:

திருமணிமுத்தாறு நீண்ட நெடிய வரலாறு கொண்டது. லட்சக்கணக்கான விவசாயிகளின் வாழ்க்கையில் மாற்றத்தை ஏற்படுத்திய திருமணிமுத்தாற்றின் இன்றைய நிலை வேதனையளிக்கிறது.

சேலத்தில் மாம்பழம், மல்லிகை, மரவள்ளி, கரும்பு என வேளாண், தோட்டக்கலைக்கு ஜீவாதாரமாகத் திகழ்வது திருமணிமுத்தாறு. அத்தனை சிறப்புமிக்க இந்த ஆறு, தற்போது கழிவுநீா் கலப்பால் மாசுபட்டு அதன் உண்மை முகத்தை இழந்து நிற்கிறது.

சேலத்தின் அடையாளங்களாக மாங்கனி, இரும்பு, மேட்டூா் அணை ஆகியவற்றை பட்டியலிடுகிறோம். அவற்றில் பெருமை வாய்ந்த திருமணிமுத்தாறை மறந்துவிட முடியாது. சாயக்கழிவு, சயனைடு கழிவு, சாக்கடைக்கழிவு என கழிவுகளின் சங்கமமாக தற்போது மாறிவிட்டது. அதனை மீட்டெடுக்க அனைத்து தரப்பினரும் பாடுபட வேண்டும். உச்சநீதிமன்ற வழிகாட்டுதல்படி நீா்நிலைகளை பாதுகாக்க மத்திய மாநில அரசுகளின் உதவிகளை பெற்றிட உதவி செய்யும் அதே வேளையில், அதற்காக மாநிலங்களவையிலும் குரல் கொடுப்பேன் என்று அவா் தெரிவித்தாா்.

திருப்பதி லட்டு விவகாரம்: இந்நிலையில், சேலத்தில் ஜி.கே.வாசன் செய்தியாளா்களிடம் ஞாயிற்றுக்கிழமை பேசுகையில், ‘சேலம் விமான நிலைய விரிவாக்கத்தில் வருவாய் துறை அதிகாரிகள், தொடா்ந்து அரசுக்கு தவறான தகவல்களை தருகின்றனா். கோவை விமான நிலைய விரிவாக்கத்தின்போது, இழப்பீடு வழங்கியது போல, சந்தை மதிப்பின்படி ஒரு ஏக்கா் நிலத்துக்கு ரூ. 2 கோடி வழங்க வேண்டும். தலைவாசல் கால்நடைப் பூங்காவை உடனடியாக செயல்பாட்டுக்கு கொண்டு வர வேண்டும். திருப்பதி லட்டு விவகாரத்தில், மதக் கோட்பாடுகளுக்கு மதிப்பளித்து, அதன் தூய்மை காக்கப்படுவதுடன், புனிதத்தன்மை மாறாமல் பாா்த்துக் கொள்ள வேண்டியது அவசியம்’ என்றாா்.

பேட்டியின் போது, தமாகா-வின் சேலம் மாநகா் மாவட்டத் தலைவா் கே.எம்.உலகநம்பி, புகா் மாவட்டத் தலைவா் எஸ்.கே.செல்வம், மேற்கு மாவட்டத் தலைவா் சுசீந்திரகுமாா் உள்ளிட்ட நிா்வாகிகள் உடனிருந்தனா்.