திமுக ஆட்சியில் விளையாட்டுத் துறைக்கு முக்கியத்துவம் இல்லை: எடப்பாடி கே.பழனிசாமி

திமுக ஆட்சியில் விளையாட்டுத் துறைக்கு முக்கியத்தும் இல்லை என்று அதிமுக பொதுச் செயலாளரும் எதிா்க்கட்சித் தலைவருமான எடப்பாடி கே.பழனிசாமி தெரிவித்தாா்.

சேலம் மாவட்டம், ஓமலூா் அருகே வேலகவுண்டனூா் பகுதியில், அதிமுக சாா்பில் மாநில அளவிலான 3 நாள் கபடி போட்டியை சனிக்கிழமை தொடங்கிவைத்து அவா் பேசியதாவது:

அதிமுக ஆட்சியில் இளைஞா் நலன்காக்க, விளையாட்டில் ஆா்வம் ஏற்படுத்த பல்வேறு திட்டங்கள் நிறைவேற்றப்பட்டன. தமிழகம் முழுவதும் 12,524 ஊராட்சிகள், 528 பேரூராட்சிகளில் அம்மா இளைஞா் விளையாட்டு திட்டத்தை ரூ. 76 கோடியில் நிறைவேற்றினோம். திமுக அரசு இந்த திட்டங்களைக் கைவிட்டு விட்டது. அதேபோல விளையாட்டு வீரா்களுக்கு 3 சதவீத இட ஒதுக்கீடு வழங்கப்பட்டது.

சா்வதேச மற்றும் தேசிய விளையாட்டுப் போட்டியில் பதக்கம் வென்ற விளையாட்டு வீரா்கள், பயிற்சியாளருக்கு, அதிமுக ஆட்சியில் ஊக்கத் தொகையாக ரூ. 38 கோடி வழங்கப்பட்டது.

மேலும், ரூ. 64 கோடியில் தமிழ்நாடு உடற்கல்வி விளையாட்டு பல்கலைக்கழகத்தில் இறகுப் பந்து, மேஜிக் பந்து, சிலம்பம் பயிற்சி மையம், குடியிருப்புகள் அமைத்து விளையாட்டு வீரா்கள் ஊக்குவிக்கப்பட்டனா். சிறந்த தேசிய மாணவா் படை மாணவருக்கான ஆண்டு உதவித்தொகை ரூ. 3 லட்சத்திலிருந்து ரூ. 15 லட்சமாக உயா்த்தப்பட்டது.

விளையாட்டு திறமையின் அடிப்படையில், ஒலிம்பிக் விளையாட்டுப் போட்டியில் பதக்கம் வெல்லக்கூடிய தலைசிறந்த ஆண், பெண் விளையாட்டு வீரா்களுக்கு தேவைக்கேற்ப உதவி செய்து, அவா்களை ஒலிம்பிக் மற்றும் சா்வதேச அளவிலான போட்டிகளில் கலந்துகொண்டு பதக்கங்கள் வெல்வதற்கு வகைசெய்யும் வகையில், சா்வதேச அளவில் பதக்கம் பெரும் நோக்கம் திட்டம் என்ற ஒரு திட்டம் தொடங்கப்பட்டு ரூ. 5 கோடி நிதி ஒதுக்கப்பட்டது.

இத்திட்டத்தின் கீழ் 5 உயா்நிலை விளையாட்டு வீரா்களுக்கு தலா ரூ.10 லட்சத்தில் அடிப்படை வசதிகள் வழங்கப்பட்டன. ஆனால் திமுக ஆட்சியில் விளையாட்டுத் துறைக்கு முக்கியத்துவம் அளிக்கப்படாமல் உள்ளது என்றாா்.