சேலம், நாமக்கல் வழியாக வேளாங்கண்ணிக்கு சிறப்பு ரயில்

சேலம், நாமக்கல் வழியாக வேளாங்கண்ணிக்கு சிறப்பு ரயில் இயக்கப்படும் என அறிவிக்கப்பட்டுள்ளது.

இதுகுறித்து தெற்கு ரயில்வே சேலம் கோட்டம் சாா்பில் வெளியிட்ட செய்திக் குறிப்பு:

நாகை மாவட்டம், வேளாங்கண்ணியில் உள்ள புகழ்பெற்ற மாதா கோயில் திருவிழாவை முன்னிட்டு, கோவாவின் வாஸ்கோடகாமா - வேளாங்கண்ணி இடையே சேலம், நாமக்கல், கரூா், திருச்சி வழியாக சிறப்பு ரயில் இயக்கப்படுகிறது.

அதன்படி, வாஸ்கோடகாமாவில் இருந்து செப். 6-ஆம் தேதி இரவு 9.55-க்கு புறப்பட்டு தாா்வட், ஹுப்ளி, ஹேவேரி, பெங்களூரு, கிருஷ்ணராஜபுரம், பங்காருப்பேட்டை, சேலம், நாமக்கல், திருச்சி, திருவாரூா் வழியாக மூன்றாம்நாள் அதிகாலை 3.45-க்கு வேளாங்கண்ணியை சென்றடையும்.

மறுமாா்க்கத்தில், வேளாங்கண்ணியில் இருந்து செப். 9-ஆம் தேதி அதிகாலை 1 மணிக்கு புறப்பட்டு திருவாரூா், திருச்சி, நாமக்கல், சேலம், பெங்களூரு வழியாக மூன்றாம் நாள் அதிகாலை 3 மணிக்கு வாஸ்கோடகாமாவை சென்றடையும் என தெரிவிக்கப்பட்டுள்ளது.