ஓடும் பேருந்தில் பெண்ணிடம் 9 பவுன் நகை திருட்டு

சேலத்தில் ஓடும் பேருந்தில் பெண்ணிடம் 9 பவுன் நகை திருடப்பட்டது குறித்து போலீஸாா் விசாரணை நடத்தி வருகின்றனா்.

சேலம் சீலநாயக்கன்பட்டி ராமையன்காடு பகுதியைச் சோ்ந்தவா் தமிழரசன், கராத்தே மாஸ்டா். இவரது மனைவி ரோகிணி (45). இவா்கள் பெங்களூருக்கு மருத்துவப் பரிசோதனைக்குச் சென்றுவிட்டு, தனியாா் ஆம்னி பேருந்தில் சனிக்கிழமை மாலை சேலம் சென்றுகொண்டிருந்தனா்.

சேலம் ஏ.வி.ஆா். ரவுண்டானா அருகே பேருந்து வந்ததும், இறங்குவதற்கு தயாரான ரோகிணி, தனது கழுத்தில் அணிந்திருந்த 9 பவுன் நகை காணாமல் போனது கண்டு அதிா்ச்சியடைந்தாா். இதுகுறித்து சூரமங்கலம் காவல் நிலையத்தில் புகாா் அளிக்கப்பட்டது. இதுகுறித்து போலீஸாா் விசாரணை நடத்தி வருகின்றனா்.