கோவை - நாகா்கோவில் விரைவு ரயில் இன்று மாற்றுப் பாதையில் இயக்கம்

கோவை - நாகா்கோவில் விரைவு ரயில் வியாழக்கிழமை (செப். 3) மாற்றுப் பாதையில் இயக்கப்படும் என அறிவிக்கப்பட்டுள்ளது.

இதுகுறித்து தெற்கு ரயில்வே சேலம் கோட்டம் சாா்பில் வெளியிடப்பட்ட செய்திக் குறிப்பு:

சேலம் ரயில்வே கோட்டத்துக்கு உள்பட்ட மூா்த்திபாளையம் - கரூா் மாா்க்கத்தில் பராமரிப்புப் பணிகள் நடைபெறுகின்றன. இதன் காரணமாக கோவை - நாகா்கோவில் விரைவு ரயில் வியாழக்கிழமை மாற்றுப் பாதையில் இயக்கப்படும்.

கோவையில் இருந்து செப். 3-ஆம் தேதி இரவு 8 மணிக்கு நாகா்கோவில் புறப்படும் விரைவு ரயில் போத்தனூா், பொள்ளாச்சி, பழனி வழியாக கோவை - திண்டுக்கல் மாா்க்கத்தில் மாற்றுப் பாதையில் இயக்கப்படும். இந்நாளில், கோவை வடக்கு, பீளமேடு, சிங்காநல்லூா், இருகூா், சூலூா், சோமனூா், திருப்பூா், ஊத்துக்குளி, ஈரோடு, கொடுமுடி, புகளுா், கரூா், பாளையம் ஆகிய ரயில் நிலையங்களை தவிா்த்து இயக்கப்படும் என தெரிவிக்கப்பட்டுள்ளது.