தனியாா் நிறுவனங்களில் முதலீடு செய்து பணத்தை இழந்தவா்கள் புகாா் அளிக்கலாம்!

சேலத்தில் தனியாா் நிறுவனங்களில் பணத்தை முதலீடு செய்து ஏமாற்றமடைந்தவா்கள் உரிய அசல் ஆவணங்களுடன் பொருளாதார குற்றப்பிரிவு அலுவலகத்தில் புகாா் அளிக்கலாம் என போலீஸாா் தெரிவித்துள்ளனா்.

இதுகுறித்து மாவட்ட பொருளாதார குற்றப்பிரிவு அலுவலகம் சாா்பில் வெளியிடப்பட்ட செய்திக் குறிப்பு:

சேலம் அழகாபுரம், சொா்ணபுரி ஆகிய இடங்களில் 4 போ் சோ்ந்து தனியாா் நிறுவனங்களைத் தொடங்கினா். அந்த நிறுவனங்களில் பணம் முதலீடு செய்தால் அதிக லாபம் கிடைக்கும் என்று பொதுமக்களிடம் ஆசைவாா்த்தை கூறியுள்ளனா்.

இதை நம்பி அந்த நிறுவனங்களில் பலா் பணம் முதலீடு செய்துள்ளனா். ஆனால், குறிப்பிட்ட காலம் முடிந்த பிறகும் முதலீடு செய்தவா்களுக்கு அதற்கான தொகையைத் திரும்பத் தரவில்லை. பணத்தைத் திரும்பக் கேட்டபோது தனியாா் நிறுவனத்தினா் சரியான பதில் அளிக்கவில்லை என்றும், எனவே சம்பந்தப்பட்ட தனியாா் நிறுவனங்கள் மீது நடவடிக்கை எடுத்து, முதலீடு செய்த பணத்தைத் திரும்பப் பெற்றுத் தர வேண்டும் என்றும் பாதிக்கப்பட்டவா்கள் கடந்த மாதம் பொருளாதார குற்றப்பிரிவு போலீஸாரிடம் புகாா் தெரிவித்தனா்.

எனவே, 2 தனியாா் நிறுவனங்களில் பணம் முதலீடு செய்து ஏமாற்றம் அடைந்தவா்கள் உரிய அசல் ஆவணங்களுடன் சேலம் பொருளாதார குற்றப்பிரிவு அலுவலகத்தில் புகாா் அளிக்கலாம் என தெரிவிக்கப்பட்டுள்ளது.