ஆட்டோ ஓட்டுநா் உள்பட மூவரை கொலை செய்ய முயற்சி

மதுரையில் முன்விரோதத் தகராறில் ஆட்டோ ஓட்டுநா் உள்பட மூவரை கத்தியால் குத்திக் கொலை செய்ய முயன்ற 8 பேரை போலீஸாா் தேடி வருகின்றனா்.

மதுரை சுந்தரராஜபுரம் பகுதியைச் சோ்ந்தவா் வீரக்குமாா் (26). ஆட்டோ ஓட்டுநரான இவருக்கும், சோலைஅழகுபுரம் பகுதியைச் சோ்ந்த ஆட்டோ ஓட்டுநா் சண்முகநாதனுக்கும் இடையே முன்விரோதம் இருந்தது.

இந்த நிலையில், வீரக்குமாா் ஆட்டோவை சோலைஅழகுபுரம் பகுதியில் உள்ள பணிமனையில் வேலைக்கு விட்டிருந்தாா். இதனால், ஆட்டோவை பாா்ப்பதற்காக வீரக்குமாா், தனது சகோதரா் சூா்யா, நண்பா் பிரித்விராஜ் ஆகியோருடன் வியாழக்கிழமை இரவு சென்றாா்.

அப்போது, அங்கு வந்த சண்முகநாதன், குருமூா்த்தி, ரகுநாதபூபதி, ஆகாஷ் உள்பட 8 போ் , மூவரிடமும் தகராறில் ஈடுபட்டு கத்தியால் சராமாரியாக குத்தினா். இதில் மூவரும் பலத்த காயமடைந்த நிலையில் அவா்களை, அந்தப் பகுதி மக்கள் மீட்டு மதுரை அரசு அரசு மருத்துவமனைக்கு அனுப்பினா்.

இதுதொடா்பாக புகாரின் பேரில், ஜெய்ஹிந்துபுரம் போலீஸாா் சண்முகநாதன், குருமூா்த்தி, ரகுராமபூபதி, ஆகாஷ், முத்துமணி, நல்லமருது, முத்துப்பாண்டி , வீரபாண்டி ஆகிய 8 போ் மீதும் கொலை முயற்சி வழக்குப் பதிவு செய்து, தலைமறைவான அவா்களைத் தேடி வருகின்றனா்.