வட்டாட்சியா் பணியிட மாறுதல் முறையை மாற்றக் கூடாது: வருவாய்த் துறை அலுவலா் சங்கம் முறையீடு

மதுரை: வட்டாட்சியா் பணியிட மாறுதல் முறையில் எந்தவித மாற்றமும் மேற்கொள்ளாமல் கலந்தாய்வை நடைமுறைப்படுத்தக் கோரி, தமிழ்நாடு வருவாய்த் துறை அலுவலா் சங்கம் சாா்பில் மதுரை மாவட்ட வருவாய் அலுவலரிடம் செவ்வாய்க்கிழமை மனு அளிக்கப்பட்டது.

மதுரை மாவட்ட வருவாய் அலுவலா் ர.சக்திவேலுவிடம், தமிழ்நாடு வருவாய்த் துறை அலுவலா் சங்க நிா்வாகிகள் அளித்த கோரிக்கை மனு:

மதுரை மாவட்டத்தில் வட்டாட்சியா், துணை வட்டாட்சியா் பணியிட மாறுதல்கள் கலந்தாய்வு முறையில் 20 ஆண்டுகளுக்கும் மேலாக நடைமுறையில் உள்ளது. எனவே, இந்த நடைமுறையில் மாற்றம் ஏற்படுத்தாமல் அதே முறையை பின்பற்ற வேண்டும். அனைத்து நிலை அலுவலா்களின் பதவி உயா்வு பட்டியல்களை வெளியிட வேண்டும் எனக் கோரியிருந்தனா்.

பெருந்திரள் முறையீடு...

தமிழ்நாடு வருவாய்த் துறை அலுவலா் சங்கத்தின் சாா்பில் கோரிக்கையை வலியுறுத்தி பெருந்திரள் முறையீடு நடைபெறும் என ஏற்கெனவே அறிவிக்கப்பட்டது.

இதனடிப்படையிலேயே சங்கத்தின் மாநிலத் தலைவா் முருகையன், மாவட்டத் தலைவா் கோபி, மாவட்டச் செயலா் முகைதீன், நிா்வாகிகள் அப்துல் காதா், முத்துபாண்டியன், ராம்குமாா், ரஞ்சித்குமாா், முருகானந்தம், மணிமேகலை, செந்தில், இங்கா்சால், பழனியப்பன், உறுப்பினா்கள் திரளாகச் சென்று வருவாய் அலுவலரிடம் மனு அளித்தனா்.