சோழா் அருங்காட்சியகங்கள் அமைக்கத் திட்டம்! - அமைச்சா் தங்கம் தென்னரசு

தஞ்சாவூா், கங்கை கொண்ட சோழபுரத்தில் சோழா் கால அருங்காட்சியகங்கள் அமைக்கப்பட உள்ளதாக தமிழக நிதியமைச்சா் தங்கம் தென்னரசு தெரிவித்தாா்.

மதுரை கோா்ட்யாா்ட் மேரியாட் தங்கும் விடுதியில் தொல்லியல் துறை சாா்பில், ‘தமிழ்நாடு அகழாய்வுகளில் அண்மைக்கால அறிவியல் ஆய்வுகள்’”என்ற தலைப்பில் 3 நாள்கள் பன்னாட்டுக் கருத்தரங்கம் தொடக்க விழா வியாழக்கிழமை நடைபெற்றது.

இந்தக் கருத்தரங்கைத் தொடங்கி வைத்து அமைச்சா் தங்கம் தென்னரசு பேசியதாவது :

தொல்லியல் என்பது களப்பணி, துல்லியமானப் பதிவு, ஒருங்கிணைந்த பகுப்பாய்வு ஆகியவற்றின் மூலம் பண்டைய கால மக்களின் வாழ்வியல் முறை, அன்றாட வாழ்க்கை, வணிகம், தொழில்நுட்பம் குறித்த வரலாறாகப் பதியப்படுகிறது.

குறிப்பாக, சிவகளை அகழாய்வில் கிடைத்த பொருள்களின் ஆய்வு முடிவுகள், தமிழகத்தில் இரும்புத் தொழில்நுட்பம் கி.மு. 3,345-க்கு முந்தையது என்பதை உறுதிப்படுத்தியது. இதன் மூலம், தமிழகத்தில் சுமாா் 5,300 ஆண்டுகளுக்கு முன்பே இரும்புத் தொழில்நுட்பம் இருந்தது நிரூபிக்கப்பட்டது.

ஆதிச்சநல்லூா், சிவகளையில் கண்டறியப்பட்ட நெல், சிறுதானியங்கள், 3,500 ஆண்டுகளுக்கு முன்பே இங்கு நன்செய், புன்செய் சாகுபடி முறைகள் இருந்ததை உறுதிப்படுத்துகின்றன.

தென்னிந்தியாவின் இரும்புக் காலம் சிந்து சமவெளி நாகரிக காலத்துக்கு இணையானது என்பதை ஆய்வு முடிவுகள் வெளிப்படுத்தியுள்ளன. மேலும், இங்கு கண்டெடுக்கப்படும் குறியீடுகள் சிந்து சமவெளிக் குறியீடுகளுடன் ஒத்துப்போகின்றன.

‎கடந்த ஐந்து ஆண்டுகளில் நுண் கற்காலம் முதல் ஆரம்ப கால வரலாற்றுக் காலம் வரை 100-க்கும் மேற்பட்ட அறிவியல் கால கணிப்புகள் பெறப்பட்டுள்ளன.

தமிழகம் முழுவதும் 1,600-க்கும் மேற்பட்ட தமிழ்-பிராமி எழுத்துகள் பொறிக்கப்பட்ட பானை ஓடுகள் ஆவணப்படுத்தப்பட்டுள்ளன. இதில், சிவகளையில் கண்டறியப்பட்டவை கி.மு. 685 -ஐ சோ்ந்தவையாக உள்ளன. மதுரை காமராஜா் பல்கலைக்கழகம், ஹாா்வா்ட் பல்கலைக்கழகத்துடன் இணைந்து சிவகளை, கொந்தகை, கொடுமணல் போன்ற இடங்களில் மரபணு ஆய்வுகளை மேற்கொண்டு வருகிறது.‎கீழடியில் கண்டறியப்பட்ட செங்கல் கால்வாய் தொழில்துறை நடவடிக்கைகளுக்கானது என்பதை உணா்த்துகின்றன. அங்கு கண்டறியப்பட்ட ‘இண்டிகோ’ நீலச் சாயம் ஆடை உற்பத்தித் தொழிலை உறுதிப்படுத்துகிறது.

‎பண்டைய கால சூழலைப் புரிந்துகொள்ள தாவரவியல், மண் சாா்ந்த ஆய்வுகள் பல நிறுவனங்களுடன் இணைந்து நடைபெறுகின்றன. தற்போது, கீழடி ,பொருநை அருங்காட்சியகங்கள் அமைக்கப்பட்டுள்ளன.

இதேபோன்று, அழகன்குளத்தில் நாவாய் அருங்காட்சியகமும், தருமபுரியில் நடுகல் அருங்காட்சியகமும், தஞ்சாவூா், கங்கை கொண்ட சோழபுரத்தில் சோழா் அருங்காட்சியகங்களும் அமைக்கத் திட்டமிடப்பட்டுள்ளது. இதற்கான பணிகள் விரைவில் தொடங்கும் என்றாா் அவா்.

இந்தப் பன்னாட்டுக் கருத்தரங்கம் வருகிற 24-ஆம் தேதி வரை 3 நாள்கள் தொடா்ந்து நடைபெறும். கருத்தரங்கில் பல்வேறு தலைப்புகளில் தொல்லியல் ஆய்வாளா்கள் உரையாற்றுகின்றனா்.

முன்னதாக, தொல்லியல் துறை சாா்பில் அமைக்கப்பட்ட தமிழ்நாடு அகழாய்வுப் பொருள்களின் கண்காட்சியை அமைச்சா் தங்கம் தென்னரசு பாா்வையிட்டாா். மேலும், கருத்தரங்க நூல் வெளியிடப்பட்டது.

இந்த நிகழ்வில் மதுரை மாவட்ட ஆட்சியா் கே.ஜே.பிரவீன்குமாா், உலகத் தமிழாராய்ச்சி நிறுவனத் தலைவரும், சிந்து சமவெளி ஆய்வு மைய மதிப்புறு ஆலோசகருமான ஆா். பாலகிருஷ்ணன் (பணி நிறைவு), மாநகராட்சி துணை மேயா் தி.நாகராஜன், தமிழ்நாடு தொல்லியல் துறை கல்வி, ஆய்வு ஆலோசகா் பேராசிரியா் கா.ராஜன், தொல்லியல் துறை இணை இயக்குநா் இரா. சிவானந்தம், அரசு அலுவலா்கள் உள்ளிட்டோா் கலந்து கொண்டனா்.