வீட்டில் இருந்த பெண்ணிடம் கத்தியை காட்டி கொள்ளை முயற்சி

பழனியில் வீட்டில் இருந்த பெண்ணிடம் கத்தியைக் காட்டி கொள்ளையடிக்க முயற்சி நடந்தது.

 பழனி கோட்டைமேட்டுத் தெருவைச் சேர்ந்தவர் குலாம்ரசூல் மனைவி அசனாத்பேகம்(50). இவர் ஞாயிற்றுக்கிழமை இரவு வீட்டில் இருந்த போது உள்ளே புகுந்த மர்ம நபர் கத்தியைக் காட்டி கொலை மிரட்டல் விடுத்தாராம். அசனாத் பேகம் கத்தியை பிடித்துக் கொண்டு சத்தம் போடவே அந்த நபர் தப்பி ஓடி விட்டாராம். இதில் அசனாத் பேகத்தின் கையில் காயம் ஏற்பட்டது. இது குறித்து அவர் கொடுத்த புகாரின் பேரில் பழனி நகர் போலீஸார் வழக்குப் பதிந்து விசாரணை நடத்தி வருகின்றனர்.

 இந்நிலையில் பழனியில் கடந்த சில நாள்களாக வீடுகளுக்குள் புகுந்து நகைகள், பணம் கொள்ளையடித்தல், பைக்கில் வந்து பெண்களிடம் நகை பறித்தல் போன்ற சம்பவங்கள் அடிக்கடி நடைபெறுகின்றன. எனவே போலீஸார் ரோந்துப்பணியை தீவிரப்படுத்த வேண்டும் என பொதுமக்கள் கோரிக்கை விடுத்துள்ளனர்.