பழனி மலைக் கோயில் உண்டியல் திறப்பு: முதல் நாள் எண்ணிக்கை ரூ.2 கோடியை தாண்டியது

பழனி தண்டாயுதபாணி சுவாமி கோயில் உண்டியல்கள் விடுமுறை நாளை முன்னிட்டு வந்த பக்தர்கள் கூட்டத்தால் 28 நாள்களில் நிரம்பியதையடுத்து, அவை புதன்கிழமை திறந்து எண்ணப்பட்டன. இதில் முதல்நாள் எண்ணிக்கையில் காணிக்கை வரவு ரூ. 2 கோடியை தாண்டியது. வியாழக்கிழமையும் உண்டியல் எண்ணிக்கை நடைபெறுகிறது.
 இதில் முதல் நாள் எண்ணிக்கையில் பக்தர்களின் காணிக்கை வரவு ரூ.2 கோடியே 4 லட்சத்து 55 ஆயிரத்து 355 கிடைத்தது. மேலும் உண்டியலில் தங்கத்தாலான வேல், பட்டை, தாலி, மோதிரம், சங்கிலி, தங்கக்காசு போன்றவற்றையும் வெள்ளியால் ஆன சிறிய வீடு, தொட்டில், வேல், கொலுசு, பாதம் போன்றவற்றையும் பக்தர்கள் காணிக்கையாக செலுத்தியிருந்தனர். தங்கம் 975 கிராமும், வெள்ளி 12, 740 கிராமும் இருந்தன. மலேசியா, சிங்கப்பூர், அமெரிக்கா, ஜப்பான், ஆஸ்திரேலியா, மியான்மர் உள்ளிட்ட பல்வேறு நாட்டு கரன்சிகள் 349-ம் கிடைத்தன. அமெரிக்க டாலர் மட்டுமே இந்திய மதிப்பில் சுமார் ஒரு லட்சத்துக்கு இருந்தது. இவை தவிர பித்தளை வேல், கைக்கடிகாரம், ஏலக்காய், முந்திரி, நவதானியங்கள், பட்டாடைகளையும் பக்தர்கள் காணிக்கையாக செலுத்தியிருந்தனர். இந்த காணிக்கை எண்ணும் பணியில் 500-க்கும் மேற்பட்டோர் ஈடுபட்டனர். உண்டியல் எண்ணும் பணி வியாழக்கிழமையும் தொடர்கிறது. இந்நிகழ்ச்சியில் பழனிக் கோயில் இணை ஆணையர் செல்வராஜ், துணை ஆணையர் (பொறுப்பு) செந்தில்குமார், மதுரை இந்து சமய அறநிலையத்துறை உதவி ஆணையர் சிவலிங்கம், கண்காணிப்பாளர் முத்துராஜா, முரளி, மேலாளர் உமா உள்ளிட்ட பலர் பங்கேற்றனர்.