பழனி மலைக்கோயிலில் நாள் முழுக்க அன்னதானம்: ஆயிரக்கணக்கான பக்தர்கள் பயன்

பழனி மலைக்கோயிலில் அன்னதான திட்டம் தொடங்கப்பட்டு 7 ஆம் ஆண்டு தொடங்கும் நிலையில் இதுவரை ஒரு கோடியே 8 லட்சம் பேர் உணவருந்தியுள்ளனர்.
மறைந்த முதல்வர் ஜெயலலிதா, கடந்த 13.09.2012 அன்று பழனி தண்டாயுதபாணி சுவாமி கோயிலிலும், திருச்சி மாவட்டம் ஸ்ரீரங்கம்  அரங்கநாதர் சுவாமி கோயிலிலும் நாள்முழுக்க அன்னதான திட்டத்தை தொடங்கி வைத்தார். காலை 8 மணி முதல் இரவு 10 மணி வரை அன்னதானம் நடைபெறும். மேலும், இந்த அன்னதானத்தில் பங்கேற்க விரும்பும் பக்தர்கள் ரூ.100  முதல் நன்கொடை வழங்கலாம்.  தவிர நிரந்தர கட்டளையாக ரூ.27,500 செலுத்தினால் வருடத்தில் ஒருநாள் அவர்கள் விரும்பும் தினத்தில் அவர்கள் பெயரில் 100 பக்தர்களுக்கு அன்னதானம் வழங்கப்படும்.
  இந்த அன்னதானத் திட்டத்துக்கு ஆண்டுதோறும் சுமார் ரூ.10 லட்சம் வரை நன்கொடை தரப்படுகிறது. உணவுக்கு பயன்படுத்தப்படும் காய்களை இருப்பு வைக்க குளிர்சாதன வசதியுடன் கூடிய அறை உள்ளது.  மேலும், மலைக்கோயிலில் மளிகைப் பொருள்கள் வைக்க அறையும் உள்ளது. 
அன்னதானக் கூடத்தில் ஒரு அமர்வுக்கு சுமார் 300 பேர் வரை சாப்பிட இடவசதி உள்ளது. சாதாரண நாள்களில் 4 ஆயிரம் பக்தர்களும், திருவிழா நாள்களில் 7 ஆயிரம் பக்தர்களும் அன்னதானத்தில் பங்கேற்கின்றனர். கடந்த 6 ஆண்டுகளில் இதுவரை சுமார் ஒரு கோடியே 8 லட்சம் பக்தர்கள் அன்னதானத்தில் பங்கேற்று உணவு அருந்தியுள்ளது குறிப்பிடத்தக்கது.