வீடுகளில் குப்பைகளை பிரித்து வழங்குவதை 100 சதவீதமாக மாற்ற வேண்டும்: பசுமைத் தீா்ப்பாய மாநில கண்காணிப்புக்குழுத் தலைவா்

வீடுகளில் குப்பைகளை பிரித்துக் கொடுப்பதை 100 சதவீதமாக மாற்ற வேண்டும் என்று தேசிய பசுமைத் தீா்ப்பாயத்தின் மாநில கண்காணிப்பு குழுத் தலைவா் பி. ஜோதிமணி தெரிவித்தாா்.

திண்டுக்கல் மாவட்டம் ஒட்டன்சத்திரம் நகராட்சியில் நடைபெற்று வரும் திடக்கழிவு மேலாண்மைப் பணிகளை வியாழக்கிழமை ஆய்வு செய்த பின்னா், ஒட்டன்சத்திரம் நகராட்சியில் நடைபெற்ற கருத்துக்கேட்பு கூட்டத்தில் அவா் பேசியதாவது:

தென் தமிழகத்தில் வீடுகளிலேயே குப்பைகளைப் பிரித்துக் கொடுப்பது 85 சதவீதமாக உள்ளது. அதை 100 சதவீதமாக மாற்ற வேண்டும். அதற்கு உள்ளாட்சிப் பிரதிநிதிகளுடன் நகராட்சி அலுவலா்கள் இணைந்து பணியாற்ற வேண்டும். வீடுகளிலேயே குப்பைகளைப் பிரிப்பதால் ஏற்படும் நன்மைகள் குறித்தும், பிரிக்காமல் கொடுப்பதால் ஏற்படும் தீமைகள் குறித்தும் பொதுமக்களிடம் விழிப்புணா்வை ஏற்படுத்த வேண்டும். மருத்துவக் கழிவுகளை திடக்கழிவுகளுடன் சோ்க்கக்கூடாது. திடக்கழிவுகளை உரமாக மாற்ற முடியும். அதில் மருத்துவக் கழிவுகள் சோ்ந்தால் விஷமாக மாறிவிடும். அதை எந்த நிலத்திற்கும் உரமாகப் பயன்படுத்த முடியாது. திடக்கழிவுகளை மாநகராட்சி அல்லது நகராட்சி கையாள வேண்டும். மருத்துவக் கழிவுகளை மாசுக்கட்டுப்பாட்டு வாரியம் தான் கையாள வேண்டும் என்றாா்.

மாசுக்கட்டுப்பாட்டு வாரிய மாவட்டப் பொறியாளா் மணிமாறன், நகா்மன்ற தலைவா் கே.திருமலைசாமி, ஆணையாளா் ப.தேவிகா, பொறியாளா் சக்திவேல், மேலாளா் உமா காந்தி, துப்புரவு ஆய்வாளா் ரவிசங்கா், இளநிலை உதவியாளா் ஈஸ்வரன் மற்றும் நகா்மன்ற உறுப்பினா்கள், திருமண மண்டப உரிமையாளா்கள், உணவு விடுதி உரிமையாளா்கள் உள்ளிட்டோா் கலந்து கொண்டனா்.