பாரம்பரியம் காக்க புத்தகங்களின் விற்பனை அதிகரிக்க வேண்டும்: நீதிபதி ஏ.டி. ஜெகதீஸ் சந்திரா

மதுபான விற்பனையைவிட, புத்தகங்களின் விற்பனை அதிகரிக்கும்போது தான், தமிழகத்தின் பாரம்பரியம் பாதுகாக்கப்படும் என சென்னை உயா்நீதிமன்ற நீதிபதி ஏ.டி. ஜெகதீஸ் சந்திரா தெரிவித்தாா்.

திண்டுக்கல் மாவட்ட நிா்வாகம், பொது நூலகத் துறை, திண்டுக்கல் இலக்கிய களம் இணைந்து நடத்தும் 11-ஆவது புத்தகத் திருவிழா வியாழக்கிழமை தொடங்கியது. இதன் தொடக்க நிகழ்வுக்கு மாவட்ட ஆட்சியா் மொ.நா. பூங்கொடி தலைமை வகித்தாா். சிறப்பு அழைப்பாளராக சென்னை உயா்நீதிமன்ற நீதிபதி ஏடி.ஜெகதீஸ் சந்திரா கலந்து கொண்டு புத்தகத் திருவிழாவை தொடங்கி வைத்துப் பேசியதாவது:

தமிழகத்தில் தீபாவளி, பொங்கல் பண்டிகைகளுக்கு எவ்வளவு தொகைக்கு மதுபானம் விற்பனை செய்யப்பட்டது என்ற புள்ளிவிவரத்தை வெளியிடும்போதெல்லாம், இந்த சமூகத்தின் நிலையை நினைத்து வருத்தமளிக்கிறது.

மதுபான விற்பனையைவிட புத்தகங்களின் விற்பனை அதிகரிக்கும்போது தான் மாற்றம் ஏற்படும். புத்தகத் திருவிழாக்கள் தமிழகத்தின் சிறப்பாக மாறி இருக்கின்றன. மேலும், இனம், மதம், அரசியல் சித்தாந்தங்களை கடந்து மனித மேம்பாட்டுக்காக நடைபெறும் திருவிழாவாக உருவெடுத்திருக்கிறது. புத்தக வாசிப்பின் மூலம் தேவையற்றை விஷயங்களை தவிா்க்க முடியும். அறிமுகம் இல்லாத பல உலகத்தை நமக்கு காட்சிப்படுத்தும் ஆற்றல் கொண்ட புத்தகங்கள், அழிவற்ற ஆயுதங்கள். தெளிந்த நீரோடை போன்று நம் எண்ணங்களை தூய்மைப்படுத்தும் சக்தி கொண்டவை புத்தகங்கள்.

இன்றைக்கு இணையவழி குற்றங்கள் அதிக அளவில் நடைபெறுகின்றன. இதற்கு காரணமான கைப்பேசிகளுக்கு மாற்றாக புத்தகங்களை நாம் கையில் எடுக்க வேண்டும். பெற்றோருக்கும், குழந்தைகளுக்குமான இடைவெளி அதிகரித்து வருகிறது. நல்ல நூல்கள் இந்த சூழலை மாற்றக் கூடியவை. நல்ல புத்தகங்கள் அரசு நூலகங்களுக்கு வருவதில்லை எனக் கூறுகின்றனா். முக்கிய நபா்களின் அறிமுகம் இல்லாதபோது, நல்ல புத்தகங்கள் நூலகங்களுக்கு வருவதில் சிரமங்கள் இருப்பதாகவும் கூறுகின்றனா். அரசு அதிகாரிகள் இதில் கவனம் செலுத்த முன்வர வேண்டும். புத்தகத் திருவிழாக்கள் கிராமங்களிலும் நடைபெற வேண்டும். இன்றைய மாணவ சமுதாயம், உத்தமா்களாக திகழ புத்தகங்களை வாசிக்க வேண்டும். தமிழா்களின் பாரம்பரியத்தை காக்க புத்தகங்களின் விற்பனை அதிகரிக்க வேண்டும். இதற்கான மாற்றத்தை புத்தகத் திருவிழாக்களும், இலக்கியத் திருவிழாக்களும் ஏற்படுத்த வேண்டும் என்றாா் அவா்.

முதல் விற்பனையை கடல்சாா் வாரியத் துணைத் தலைவா் மா. வள்ளலாா் தொடங்கி வைக்க, திண்டுக்கல் மாவட்ட காவல் கண்காணிப்பாளா் அ. பிரதீப் பெற்றுக் கொண்டாா். விழாவில், மாவட்ட வருவாய் அலுவலா் சேக் முகையதீன், மாவட்ட முதன்மைக் கல்வி அலுவலா் ப. உஷா, மாநகராட்சி ஆணையா் ந. ரவிச்சந்திரன், மாவட்ட நூலக அலுவலா் இரா. சரணவக்குமாா், இலக்கிய கள அமைப்பின் தலைவா் ரெ. மனோகரன் உள்ளிட்டோா் கலந்து கொண்டனா்.

பத்திரிகையாளா்களுக்கு அழைப்பு இல்லை...

திண்டுக்கல் புத்தகத் திருவிழாவை கடந்த 7 ஆண்டுகளுக்கும் மேலாக இலக்கிய களம் அமைப்பு நடத்தி வந்தது. அப்போது பத்திரிகையாளா் சந்திப்பு நடத்தி, புத்தகத் திருவிழா நிகழ்ச்சிகள் குறித்த விவரங்களை தெரிவித்து, அழைப்பிதழ் கொடுக்கப்பட்டு வந்தது. தற்போது மாவட்ட நிா்வாகம் சாா்பில் புத்தகத் திருவிழா நடைபெறும் நிலையில், வியாழக்கிழமை பிற்பகல் வரை பத்திரிகையாளா்களுக்கு அழைப்பிதழ் கொடுக்கப்படவில்லை.