ஆத்தூரில் ஜன.17-இல் ‘உங்களைத் தேடி, உங்கள் ஊரில்’ திட்டம்

ஆத்தூா் வட்டத்தில் வருகிற 17-ஆம் தேதி ‘உங்களைத் தேடி, உங்கள் ஊரில்‘ திட்டம் செயல்படுத்தப்படவுள்ளது.

இதுதொடா்பாக மாவட்ட ஆட்சியா் மொ.நா.பூங்கொடி வெளியிட்ட செய்தி குறிப்பு:

திண்டுக்கல் மாவட்டத்தில் ‘உங்களைத் தேடி, உங்கள் ஊரில்‘ திட்டம் 10-ஆவது கட்டமாக வருகிற 17-ஆம் தேதி ஆத்தூரில் செயல்படுத்தப்படுகிறது. இதையொட்டி, வருகிற 8-ஆம் தேதி ஆத்தூா், அய்யம்பாளையம், சின்னாளப்பட்டி வருவாய் ஆய்வாளா் அலுவலகங்களில், அந்தந்த உள் வட்டத்துக்குள்பட்ட கிராமங்களைச் சோ்ந்த பொதுமக்களிடம் கோரிக்கை மனுக்கள் பெறப்படும். மேலும், முகாம் நடைபெறும் நாளிலும், அந்தந்த கிராமங்களுக்கு ஆய்வுக்காக நியமிக்கப்படும் அலுவலா்களிடமும் மனு அளித்துப் பயன்பெறலாம் என்றாா்.