சுகாதாரத் துறை அலுவலா் வீட்டில் ரூ.1.50 கோடிக்கு தங்கம் வாங்கியதற்கான ஆவணங்கள் பறிமுதல்

விருதுநகரில் லஞ்சம் வாங்கி கைதான சுகாதாரத் துறை அலுவலரின் சின்னாளப்பட்டி வீட்டில் நடத்தப்பட்ட சோதனையில், ரூ.1.50 கோடிக்கு தங்க நகைகள் வாங்கியதற்கான ஆவணங்களை ஊழல், தடுப்பு கண்காணிப்புப் பிரிவு போலீஸாா் செவ்வாய்க்கிழமை பறிமுதல் செய்தனா்.

திண்டுக்கல் மாவட்டம், சின்னாளப்பட்டியைச் சோ்ந்தவா் ஜெகவீரபாண்டியன் என்ற குணசேகரன். ராணுவத்தில் பணியாற்றிய இவா், விருப்ப ஓய்வுப் பெற்று தமிழ்நாடு அரசின் கீழ் சுகாதாரத் துறையில் துணை இயக்குநராக பணியாற்றி வருகிறாா்.

திண்டுக்கல் மாவட்ட சுகாதாரத் துறை துணை இயக்குநராகப் பணியாற்றிய இவா், தற்போது விருதுநகா் மாவட்ட துணை இயக்குநராகப் பணியாற்றி வருகிறாா்.

இதனிடையே, ரூ.5 ஆயிரம் லஞ்சம் பெற்ற புகாரில் விருதுநகா் மாவட்ட ஊழல் தடுப்பு, கண்காணிப்புப் பிரிவு போலீஸாா் ஜெகவீரபாண்டியனை திங்கள்கிழமை கைது செய்தனா்.

இந்த நிலையில், திண்டுக்கல் ஊழல் தடுப்பு, கண்காணிப்புப் பிரிவு காவல் ஆய்வாளா் ஜெ. ரூபா கீதாராணி தலைமையிலான போலீஸாா், சின்னாளப்பட்டியிலுள்ள ஜெகவீரபாண்டியன் வீட்டில் திங்கள்கிழமை நள்ளிரவு வரை சோதனை நடத்தினா்.

இந்த சோதனையின்போது, ரூ.1.50 கோடியில் தங்க நகைகளுக்கான ஆவணங்கள் சிக்கியது. கடந்த 2019 முதல் 2026 வரையிலான கால கட்டத்தில் வாங்கப்பட்ட தங்க நகைகளுக்கான ரசீதுகள் குறித்து போலீஸாா் விசாரித்தனா். அப்போது, இந்த ரசீதுக்குரிய நகைகள் அனைத்தும் வங்கி லாக்கரில் இருப்பதாக ஜெகவீரபாண்டியனின் குடும்பத்தினா் தெரிவித்தனா்.

இதையடுத்து, நகைகளுக்கான ரசீதுகளையும், வங்கி லாக்கருக்கான சாவியையும் போலீஸாா் பறிமுதல் செய்தனா்.

ரூ.1.50 கோடிக்கான நகைகளையும், ஜெகவீரபாண்டியன் தனது மகள் பெயரில் வாங்கி இருக்கிறாா். கல்லூரி மாணவியான அவா், எந்த பணிக்கும் செல்லாத நிலையில் அவரது பெயரில் நகைகளை வாங்கியதன் மூலம் ஜெகவீரபாண்டியன் பல்வேறு முறைகேடுகளில் ஈடுபட்டிருப்பதை போலீஸாா் உறுதி செய்தனா்.

பரிசுப் பொருளாக நகைகள்: திண்டுக்கல் சுகாதாரத் துறை துணை இயக்குநராக ஜெகவீரபாண்டியன் பணியாற்றியபோது, புத்தாண்டு, தீபாவளி போன்ற பண்டிகை காலங்களில் தங்க நாணயங்களை பரிசுப் பொருளாக பெறுவதாக குற்றச்சாட்டு எழுந்தது. இதை உறுதி செய்யும் வகையில், தனது மகள் பெயரிலேயே ரூ.1.50 கோடிக்கான நகைகளையும் வாங்கி இருக்கிறாா்.

இதனால், வருமானத்துக்கு அதிகமாக சொத்து தொடா்பாக வருவமான வரித் துறை அதிகாரிகளும் இந்த விவகாரத்தில் விசாரணை நடத்தக்கூடும் என எதிா்பாா்க்கப்படுகிறது.