ரயில்வே சுரங்கப் பாதையில் மழைநீா் தேக்கம்: பொதுமக்கள் அவதி

எரியோடு அருகே ரயில்வே சுரங்கப் பாதையில் மழைநீா் தேங்கி நிற்பதால், சுற்றுப்புறக் கிராமங்களைச் சோ்ந்த பொதுமக்கள் அவதிக்குள்ளாகி வருகின்றனா்.

திண்டுக்கல் மாவட்டம், எரியோடு அடுத்த நல்லமணாா்கோட்டை பகுதியில் ரயில்வே சுரங்கப் பாதை உள்ளது. திண்டுக்கல்-கரூா் வழித் தடத்தில் அமைந்துள்ள இந்த சுரங்கப் பாதை வழியாக, நல்லமணாா்கோட்டை தும்மலக்குண்டு, பி.கொசவப்பட்டி, திருக்கண், தொட்டணம்பட்டி, நாயக்கனூா், சொட்டமாயனூா், கோட்டைமந்தை உள்ளிட்ட 25-க்கும் மேற்பட்ட கிராமங்களைச் சோ்ந்த பொதுமக்கள் பயணித்து வருகின்றனா்.

கடந்த 8 ஆண்டுகளுக்கு முன்பு இந்தக் கடவுப் பாதைக்கு மாற்றாக சுரங்கப் பாதை அமைக்கப்பட்டது. இந்தப் பாதையில் மேற்கூரை அமைக்கும் பணி கடந்த 2 மாதங்களாக நடைபெற்று வருகிறது.

இதனிடையே, கடந்த சில நாள்களாக பெய்த பலத்த மழையின் காரணமாக, இந்த சுரங்கப் பாதையில் மழைநீா் தேங்கி நிற்கிறது. இதனால், 25 கிராமங்களைச் சோ்ந்த பொதுமக்கள் இந்த வழியாக செல்வதற்கு சிரமம் அடைந்து வருகின்றனா்.

எனவே, பொதுமக்களின் தேவையைக் கருத்தில் கொண்டு, சுரங்கப் பாதையில் தேங்கி நிற்கும் மழைநீரை உடனடியாக அப்புறப்படுத்துவதற்கு ரயில்வே நிா்வாகம் உரிய நடவடிக்கை எடுக்க வேண்டும் எனக் கோரிக்கை எழுந்துள்ளது.