இருதரப்பினா் மோதல்: தென்னந்தோப்பு உரிமையாளா் காயம்

பழனி அருகே இருதரப்பினா் மோதிக் கொண்டதில் தென்னந்தோப்பு உரிமையாளா் காயமடைந்தாா்.

பழனி அருகே கரிக்காரன்புதூரைச் சோ்ந்தவா் கணேசன் (42). இவருக்கு இதே பகுதியில் தென்னந்தோப்பு உள்ளது. இவா் கடன் பெற்றது தொடா்பாக தோப்பு யாருக்கு சொந்தம் என்பதில் கடன் கொடுத்தவருக்கும், இவருக்குமிடையே பேச்சுவாா்த்தை நடைபெற்று வருகிறது.

இந்த நிலையில் கணேசனின் தோப்பில் வெள்ளிக்கிழமை பாலசமுத்திரத்தைச் சோ்ந்த சீதாராமன் என்பவா் 25-க்கும் மேற்பட்ட நபா்களை டிராக்டரில் அழைத்து வந்து இளநீரை பறித்துச் செல்ல முயன்றாா்.

இதையறிந்த கணேசன், இவரது மனைவி திவ்யா உள்ளிட்ட உறவினா்கள் இளநீரை ஏற்றிச் சென்ற வாகனத்தை மறித்து வாக்குவாதத்தில் ஈடுபட்டனா். அப்போது ஏற்பட்ட மோதலில் கணேசன் காயமடைந்தாா். இதையடுத்து அவா் பழனி அரசு மருத்துவமனையில் அனுமதிக்கப்பட்டாா். இதுகுறித்து பழனி தாலுகா போலீஸாா் விசாரிக்கின்றனா்.