நோட்டாவுக்கு தனி சின்னம் தேவையற்றது:ஹெச்.ராஜா

நோட்டாவுக்கு என தனி சின்னம் தேவையற்றது என பாஜக தேசியச் செயலர் எச்.ராஜா தெரிவித்தார்,

 சென்னையிலிருந்து விமானம் மூலம் வெள்ளிக்கிழமை மதுரை வந்த அவர் செய்தியாளர்களிடம் கூறியது:   தமிழகத்தின் 234 தொகுதிகளிலும் பூத் கமிட்டி அமைக்க நிர்வாகிகள் ஆலோசனைக் கூட்டம் நடத்தி வருகிறோம். தேர்தலை சந்திக்க பாஜக தயாராக உள்ளது. நோட்டாவுக்கு என தனியாக சின்னம் தேவையில்லாதது.

நோட்டாவிற்கு வாக்களிப்பது ஜனநாயகக் கடமையை ஆற்றாததற்குச் சமம். கட்சிகள் பிடிக்கவில்லை எனில் வேட்பாளர்களைப் பார்த்தாவது வாக்களிக்க வேண்டும். தமிழகத்தில் கூட்டணி குறித்து கட்சியின் மேலிடப் பொறுப்பாளர் பிரகாஷ் ஜவடேகர் பேசிக்கொண்டிருக்கிறார். கூட்டணி குறித்து தேசியத் தலைமை அறிவிக்கும். ராஜிவ்காந்தி கொலை வழக்கில் கைது செய்யப்பட்ட 7 பேர் விடுதலை குறித்து மத்திய அரசு நீதிமன்ற நடைமுறையை பின்பற்றும் என்றார். முன்னதாக விமான நிலையத்தில் அவருக்கு பாஜகவினர் சிறப்பான வரவேற்பளித்தனர்.