தமிழக அரசின் சாதனைகளை விளக்கி அமைச்சர் தலைமையில் சைக்கிள் பேரணி

தமிழக அரசின் சாதனைகளை விளக்கி ஜெ. பேரவை சார்பில் ஆயிரம் இளைஞர்கள் பங்கேற்ற சைக்கிள் பேரணி ஞாயிற்றுக்கிழமை கள்ளிக்குடியில் நடைபெற்றது. 
திருமங்கலம் சட்டப்பேரவை தொகுதிக்கு உள்பட்ட கள்ளிக்குடி ஒன்றியத்தில் ஜெ. பேரவை மாநிலச் செயலரும், வருவாய் மற்றும் பேரிடர் மேலாண்மைத்துறை அமைச்சருமான 
ஆர்.பி.உதயகுமார் தலைமையில் சைக்கிள் பிரச்சார பேரணி நடைபெற்றது. 
திருமங்கலத்தை அடுத்த சிவரக்கோட்டையில் தொடங்கிய இப்பேரணி கள்ளிக்குடி, சமத்துவபுரம், அரசபட்டி, கொக்குளம் உள்ளிட்ட 20 கிராமங்கள் வழியாக சென்று மீண்டும் சிவரக்கோட்டையில் நிறைவடைந்தது.   பின்னர் அமைச்சர் செய்தியாளர்களிடம் கூறியது:    
அரசின் சாதனை விளக்கங்களை கூறும் சைக்கிள் பேரணி முதன் முதலாக மதுரை பாண்டி கோயிலில் தொடங்கி அடுத்தடுத்து பல்வேறு மாவட்டங்களில் நடைபெற்றது. 
திமுக தற்போது பலவீனமாக உள்ளது. அதற்காக கிராமசபை கூட்டம் நடத்துகிறார்கள். திமுகவில் தற்போது சேர்ந்த முன்னாள் அமைச்சர் செந்தில்பாலாஜியை முன்னிலைப்படுத்துவதால் அந்தக் கட்சி உறுப்பினர்கள் அதிருப்தியில் உள்ளனர். 
மத்திய அரசிடமிருந்து தேவையான நிதிகளைப் பெறவே அமைச்சர்கள் புதுதில்லி சென்று வந்தனர். கூட்டணி குறித்தெல்லாம் மூத்த தலைவர்கள் தான் முடிவு செய்வார்கள் என்றார்.