விநாயகர் சதுர்த்தி: பூஜைப் பொருள்கள் வாங்க அலைமோதிய மக்கள் கூட்டம்

விநாயகர் சதுர்த்தியை முன்னிட்டு மதுரையில் பூஜைப் பொருள்கள் வாங்க மக்கள் கூட்டம் கடைகளில் புதன்கிழமை மாலை அலைமோதியது. 
 நாடெங்கும் விநாயகர் சதுர்த்தி வியாழக்கிழமை கொண்டாடப்படுகிறது. மதுரையில் மீனாட்சி சுந்தரேசுவரர் கோயிலில் உள்ள முக்குருணி விநாயகருக்கு 18 படி அரிசியில் கொழுக்கட்டை தயார் செய்து, வியாழக்கிழமை காலை படையல் செய்யப்படுகிறது. நகரில் இந்து முன்னணி உள்ளிட்ட அமைப்புகள் சார்பில் 250-க்கும் மேற்பட்ட இடங்களில் விதவிதமான விநாயகர் சிலைகள் வைக்கப்பட்டு பூஜைகள் நடைபெறுகின்றன.
 பொதுமக்கள் தங்களது வீடுகளிலும் சிறிய சிலைகளை வைத்து பூஜை செய்வது வழக்கம். அதற்காக மதுரையில் ஜீவாநகர், சுந்தரராஜபுரம் மார்க்கெட் பகுதி, மேலமாசி வீதி-வடக்குமாசி வீதி, காளவாசல், தல்லாகுளம், யானைக்கல் உள்ளிட்ட இடங்களில் களிமண்ணில் செய்யப்பட்ட விநாயகர் சிலைகள் விற்பனைக்கு வைக்கப்பட்டன. இச்சிலைகள் ரூ.10 முதல் ரூ.150 வரை விற்கப்பட்டன. அவற்றை பொதுமக்கள் ஆர்வமுடன் வாங்கிச்சென்றனர்.
 மேலும், விநாயகருக்கு பிடித்தமான எருக்கம்பூ மாலை, அருகம்பூ மாலை மற்றும் அவல், பொறிக்கடலை, கொய்யா, பேரிக்காய் பழங்கள், வாழை இலைகள் உள்ளிட்ட பூஜைப் பொருள்களை வாங்க பொதுமக்கள் கூட்டம் அலைமோதியது. பூஜைக்கான பூக்கள் அதிகம் விற்பனையானதால் அவற்றின் விலையும் அதிகமாக இருந்தது. மல்லிகை, முல்லை உள்ளிட்டவை மட்டுமின்றி கனகாம்பரம், கதம்ப பூக்களால் ஆன மாலையும் கூடுதல் விலைக்கு விற்கப்பட்டன.
 மதுரையில் மேலமாசி வீதி ஆலாலய விநாயகர் கோயில், ரயில்வே காலனி விநாயகர், புதூர் மற்றும் சாய் நகர் சித்தி விநாயகர் என அனைத்துக் கோயில்களும் மின் விளக்குகளால் அலங்கரிக்கப்பட்டுள்ளன. சிறப்பு சொற்பொழிவுகளுக்கும் ஏற்பாடுகள் செய்யப்பட்டுள்ளன.