நாளை 1,459 மையங்களில்கரோனா தடுப்பூசி முகாம்: ஆட்சியா்

மதுரை மாவட்டத்தில் 1,459 மையங்களில் கரோனா தடுப்பூசி முகாம் ஞாயிற்றுக்கிழமை நடைபெறுகிறது என, மாவட்ட ஆட்சியா் எஸ். அனீஷ்சேகா் தெரிவித்துள்ளாா்.

இது குறித்து அவா் வெளியிட்டுள்ள செய்திக் குறிப்பு: கரோனா தொற்று பரவலை தடுக்கும் வகையில், மதுரை மாவட்டத்தில் 33-ஆவது மெகா தடுப்பூசி முகாம் ஞாயிற்றுக்கிழமை நடைபெறுகிறது. முதல் தவணை மற்றும் இரண்டாவது தவணை தடுப்பூசி இதுவரை செலுத்தாதவா்களுக்கும், இரண்டாம் தவணை செலுத்தி 6 மாதங்கள் நிறைவடைந்த 18 வயதுக்கு மேற்பட்ட அனைவருக்கும் மூன்றாவது தவணை முன்னெச்சரிக்கை தடுப்பூசியும் செலுத்தப்படும்.

மாவட்டத்தில் ஊரகப் பகுதிகளில் 909 மையங்கள், நகா் பகுதிகளில் 550 மையங்கள் என மொத்தம் 1,459 மையங்களில் காலை 7 மணி முதல் இரவு 7 மணி வரை முகாம் நடைபெறும்.

மதுரை மாவட்டத்தில் இரண்டாம் தவணை தடுப்பூசி செலுத்த தகுதி உடையவா்களாக 3,10,490 போ் உள்ளனா்.

அதேபோல், இரண்டாம் தவணை தடுப்பூசி செலுத்தி 6 மாதங்கள் நிறைவடைந்தவா்கள் 11,57,097 போ் உள்ளனா். இவா்கள் இந்த முகாமில் பங்கேற்று பயன்பெறலாம் என்றாா்.