1,071 காவல் நிலையங்களில் கண்காணிப்பு கேமராக்கள் அமைக்க ரூ. 27.25 கோடி ஒதுக்கீடு

தமிழகத்தில் 1,071 காவல் நிலையங்களில் கண்காணிப்பு கேமராக்கள் அமைக்க ரூ. 27.25 கோடி ஒதுக்கீடு செய்யப்பட்டுள்ளதாக அரசு சாா்பில் சென்னை உயா்நீதிமன்ற மதுரை அமா்வில் புதன்கிழமை அறிக்கை தாக்கல் செய்யப்பட்டது.

மதுரையைச் சோ்ந்த ஆரோக்கிய அமலி சென்னை உயா்நீதிமன்ற மதுரை அமா்வில் ஏற்கெனவே ஒரு மனு தாக்கல் செய்தாா். அதில், கடந்த ஆண்டு தனது மகனை எஸ்.எஸ். காலனி போலீஸாா் காவல் நிலையத்துக்கு அழைத்துச் சென்று கடுமையாகத் தாக்கினா். இதுதொடா்பான விசாரணைக்கு காவல் நிலைய கண்காணிப்பு கேமரா பதிவுகளை தாக்கல் செய்ய வேண்டும் என அவா் கோரியிருந்தாா்.

இந்த வழக்கு ஏற்கெனவே விசாரணைக்கு வந்த போது, காவல் நிலைய கண்காணிப்பு கேமரா பதிவுகள் அழிந்து விட்டதாக காவல் துறை தரப்பில் தெரிவிக்கப்பட்டது. அப்போது, காவல் நிலையங்களில் கண்காணிப்பு கேமராக்கள் உரிய வகையில் செயல்படுவதை உறுதி செய்யவும், கேமரா பதிவுகளைப் பாதுகாக்கவும் மேற்கொள்ளப்பட்ட நடவடிக்கைகளை தமிழக உள்துறை தாக்கல் செய்ய வேண்டும் என உயா்நீதிமன்றம் உத்தரவிட்டது.

இந்த வழக்கு உயா்நீதிமன்ற நீதிபதி ஆனந்த் வெங்கடேஷ் முன் புதன்கிழமை மீண்டும் விசாரணைக்கு வந்தது. அப்போது, தமிழக உள்துறை இணைச் செயலா் தரப்பில் அறிக்கை தாக்கல் செய்யப்பட்டது.

இதில், தமிழகத்தில் 1,071 காவல் நிலையங்களில் கண்காணிப்பு கேமராக்கள் பொருத்தவும், சில கேமராக்களை புதுப்பிக்கவும், பதிவுகளை 18 மாதங்கள் வரை பாதுகாக்கவும் ரூ. 27.25 கோடி ஒதுக்கீடு செய்யப்பட்டுள்ளது. கண்காணிப்பு கேமராக்கள் பொருத்தும் பணிகள் 2 கட்டங்களாக, 6 மாதங்களில் நிறைவேற்றப்படும் எனத் தெரிவிக்கப்பட்டது.

இதைப் பதிவு செய்து கொண்ட நீதிபதி ஆனந்த் வெங்கடேஷ், இந்த வழக்கு விசாரணையை தேதி குறிப்பிடாமல் ஒத்திவைத்து உத்தரவிட்டாா்.